ایف آئی اے نے کراچی کے علاقے گارڈن ایسٹ میں غیر قانونی کرنسی ایکسچینج میں ملوث گینگ کا اہم سرغنہ گرفتارکرتے ہوئے لاکھوں روپے مالیت کی ملکی اور غیر ملکی کرنسی برآمد کی ہے۔
ایف آئی اے اسٹیٹ بینک سرکل کراچی نے ڈپٹی ڈائریکٹر ایاز مہر کی زیر نگرانی کارروائی کے نتیجہ میں حوالہ ہنڈی اور غیر قانونی کرنسی ایکسچینج میں ملوث ملزم نور محمد کو گرفتار کیا ہے، جو بغیر لائسنس غیر ملکی کرنسی ایکسچینج میں بھی ملوث تھا۔
ڈائریکٹر ایف آئی اے کراچی زون زعیم اقبال شیخ کی ہدایت پر حوالہ ہنڈی اور غیر قانونی کرنسی ایکسچینج میں ملوث عناصر کے خلاف جاری کریک ڈاؤن کے دوران اس حالیہ کارروائی میں ملزم سے 26 سو امریکی ڈالر، 6 سو 50 یو اے ای درہم اور 31 لاکھ روپے بھی برآمد کیے ہیں۔
ترجمان ایف آئی اے کے مطابق گرفتار ملزم نور محمد سے 2 عدد موبائل فونز، ہنڈی حوالہ سے متعلق پیغامات، متعدد ہنڈی حوالہ کے رجسٹرز بھی برآمد کیے گئے ہیں، جس سے متعلق ملزم ایف آئی اے حکام کو مطمئن نہیں کر سکا، ملزم کو گرفتار کر کے تفتیش کا آغاز کر دیا گیا جبکہ دیگر ملزمان کی گرفتاری کے لیے چھاپے مارے جا رہے ہیں۔
