پاکستان کسٹمز اور سیکیورٹی فورسز نے طورخم بارڈر ٹرمینل پر افغانستان کے راستے پاکستان میں جدید امریکی ہتھیار اسمگل کرنے کی کوشش ناکام بنادی ہے۔
تفصیلات کے مطابق طورخم بارڈر ٹرمینل پر ایک گاڑی کر روک کر چیکنگ کی گئی تو گاڑی میں موجود پیاز سے بھری بوریوں سے جدید امریکی ہتھیار برآمد ہوئے۔
سیکیورٹی فورسز نے اس گاڑی کے افغان ڈرائیور کو حراست میں لے لیا ہے، جس سے دوران تفتیش اہم انکشافات متوقع ہیں۔
مزید پڑھیں
برآمد کیے گئے اسلحہ میں جدید امریکی ساختہ ایم فور، کلاشنکوف، میگزین، مختلف نوعیت کی ہزاروں گولیاں، امریکی رائفل گرنیڈ، نائٹ ویژن سائیٹس اور لیزر بیم شامل ہیں۔
افغانستان سے جدید امریکی اسلحہ کی پاکستان اسمگلنگ اور ٹی ٹی پی کا سیکیورٹی فورسز اور پاکستانی عوام کے خلاف امریکی اسلحہ کا استعمال افغان عبوری حکومت کا اپنی سرزمین پاکستان کے خلاف استعمال نہ ہونے کے دعووں پر بہت بڑا سوالیہ نشان ہے۔
پاکستان افغانستان سے توقع رکھتا ہے کہ وہ ٹی ٹی پی کے خلاف ٹھوس اقدامات کرے اور غیر قانونی ہتھیاروں کی اسمگلنگ کو روکے۔ ماضی میں بھی پاکستان میں دہشت گردی کے متعدد واقعات میں افغان نژاد دہشت گردوں اور غیرملکی اسلحہ کے استعمال کے ثبوت منظرعام پر آ چکے ہیں۔
