خصوصی سرمایہ کاری سہولت کونسل ( ایس آئی ایف سی ) کی ایگزیکٹو کمیٹی کا نگران وزیر برائے منصوبہ بندی، ترقی و خصوصی اقدامات کی زیر صدارت 2 روزہ اجلاس منعقد ہوا جس میں اہم شعبوں میں مختلف پالیسی سطح کے اقدامات اور منصوبوں کی پیشرفت کا جائزہ لیا گیا۔
اجلاس کے افتتاحی روز متعلقہ وزارتوں نے مختلف منصوبوں اور متعلقہ پہلوؤں پر پیش رفت پیش کی اور کاروبار اور سرمایہ کاری کے ماحول کو مزید بہتر بنانے کے لئے مختلف اقدامات کی سفارش کی۔
کمیٹی نے دوست ممالک کے ساتھ مختلف شعبوں میں مجموعی پیش رفت اور اقتصادی روابط کی سطح بالخصوص متحدہ عرب امارات اور ریاست کویت کے ساتھ مفاہمت کی یادداشتوں اور
معاہدوں پر دستخط کو سراہا۔
کمیٹی نے وزارتوں کو ہدایت کی کہ وہ معاہدوں کو حقیقت میں تبدیل کرنے کے لئے منصوبوں پر کام میں تیزی لائیں۔
مزید پڑھیں
کمیٹی نے مختلف اقتصادی زونز کے قیام سے متعلق نظامی امور کا جائزہ لیا اور قومی سطح پر صنعتی ترقی کے نظام کو بہتر بنانے کے لئے مختلف اقدامات پر غور و خوض کیا۔
کمیٹی نے سرکاری ملکیت والے اداروں (ایس او ای) کی نجکاری کے جاری عمل کا جائزہ لیا اور متعلقہ اسٹیک ہولڈرز کو ہدایت کی کہ وہ مقررہ ٹائم فریم کے مطابق عمل کو تیز کریں۔
کمیٹی نے کاروبار اور سرمایہ کاری سے متعلق دوست ممالک کے لیے ایس آئی ایف سی ویزا سہولت کا باضابطہ منظوری دی جو غیر ملکی سرمایہ کاروں کے لئے سازگار ماحول پیدا کرنے کے لئے ایک اہم سنگ میل ہے۔
اجلاس میں متعلقہ وفاقی و صوبائی وزراء اور اعلیٰ سرکاری حکام نے بھی شرکت کی۔2 روزہ اجلاس کل بھی جاری رہے گا
