گھڑی چور کو انتخابی نشان گھڑی دے دینا چاہیے، محسن شاہ نواز رانجھا

مسلم لیگ ن کے رہنما محسن شاہ نواز رانجھا نے کہا ہے کہ نااہل اور گھڑی چوری کو صادق و امین کہا گیا، سابق چیئرمین پی ٹی آئی سرٹیفائیڈ چور ہے، گھڑی چور کو انتخابی نشان گھڑی دے دینا چاہیے۔

لاہور میں میڈیا سے گفتگو کرتے ہوئے محسن شاہ نواز رانجھا کا کہنا تھا کہ نااہل شخص کو معصوم کا سرٹیفکیٹ دیا گیا، جسے معصوم کہہ رہے ہیں وہ قومی سلامتی کے لیے خطرہ ہے۔ عدالتیں اسے کرپٹ اور نااہل قرار دے چکی پھر بھی معصوم کہا گیا۔

محسن شاہ نواز رانجھا کا کہنا تھا کہ بانی پی ٹی آئی پاکستان کی خارجہ پالیسی کے لیے خطرہ ہیں، ملک میں سرمایہ کاری کرنے والوں پر ہی کرپشن کا الزام لگایا گیا۔ یہ کیسا معصوم ہے جو ملک میں تشدد کو فروغ دیتا ہے؟ 2013 سے جو تشدد شروع ہوا وہ 9 مئی کو انتہا پر پہنچا۔

ان کا کہنا تھا کہ اسے معصومیت کا سرٹیفکیٹ مل رہا ہے جس نے پارلیمنٹ پر حملہ کیا، سیاسی پوائنٹ سکورنگ کے لیے دوست ممالک کی کمپنیوں پر کرپشن کا الزام لگایا گیا۔ اس شخص نے پارلیمنٹ اور پاکستان ٹیلی ویژن پر حملہ کیا۔