بالی ووڈ اداکار رنبیر کپور اور شردھا کپور اپنی نئی آنے والی فلم ’تو جھوٹی میں مکار‘کے ٹریلر کے لانچ ہونے کے بعد سے الگ الگ اپنی فلم کی تشہیر کر رہے ہیں۔
حال ہی میں میڈیا سے گفتگو کے دوران میں رنبیر کپور سے پوچھا گیا کہ کیا ان کی اہلیہ عالیہ بھٹ نے انہیں شردھا کپور کے ساتھ فلم کی تشہیر سے روک دیا ہے؟
سوال کے جواب میں رنبیر کپور نے کہا کہ ’’ وہ کیوں منع کرے گی ؟ آپ ایسے ہی افواہ اڑا رہے ہو۔ آج کل میری زندگی میں کوئی تنازعہ نہیں ہے‘‘۔
واضح رہے کہ اس سے قبل بھی رنبیر اپنی اور شردھا کی نئی آنے والی فلم ’ تو جھوٹی میں مکار ‘ کی الگ الگ تشہیر کرنے کی وجہ بتا چکے ہیں ۔ انہوں نے بتایا تھا کہ فلم بنانے والے چاہتے ہیں کہ اس نئی جوڑی کو لوگ پہلے بڑی اسکرین پر دیکھیں۔
چنانچہ رنبیر سے جب ان کی حالیہ میڈیا ٹاک کے دوران میں فلم کی تشہیر کے بارے میں دوبارہ پوچھا گیا تو انہوں نے کہا کہ وہ ان کے بارے میں افواہیں نہ پھیلائیں ۔ انہوں نے واضح طور پر کہا کہ عالیہ نے ایسی بات کبھی نہیں کی۔
فلم ’ تو جھوٹی میں مکار ‘ ایک رومانوی کامیڈی فلم ہے جس کے ڈائریکٹر لو رانجن ہیں جبکہ اس فلم کی کہانی راحول مودی نے لکھی ہے۔
فلم ’ تو جھوٹی میں مکار ‘ کا پوسٹر 1949کی بھارتی فلم ’ برسات ‘ سے کافی مماثلت رکھتا ہے۔
فلم ’ تو جھوٹی میں مکار ‘8 مارچ کو سینیما گھروں کی زینت بنے گی۔
