سابق صدرمملکت آصف زرداری نے کہا ہے کہ انتخابات وقت پر ہوتے دیکھ رہاہوں۔ ابھی الیکشن کاماحول بنے گا تو پھر سیاسی فیصلے کریں گے۔ ہم حکومت کاحصہ ضرور ہیں مگر پی ڈی ایم میں نہیں۔
مردم شماری پر سندھ کو تحفظات ہیں۔ بلاول جوان ہے اس کو غصہ آ جاتا ہے اور ہم غصہ پی جانے کے عادی ہیں۔
وہاڑی میں پریس کانفرنس کرتے ہوئے سابق صدرمملکت نے کہا کہ عمران خان سیاست دان نہیں اس لیے اس سے کوئی بات نہیں ہوسکتی۔میں ایسے شخص سے کیا بات کروں جو یوٹرن پر یقین رکھتا ہے۔
عمران خان عدالتوں میں پیش ہونے سے ڈرتا ہے:
آصف زرداری کا کہنا تھا کہ کسی کی گرفتاری میرا مسئلہ نہیں یہ وزیرداخلہ کا کام ہے۔عمران خان عدالتوں میں پیش ہونے سے ڈرتا ہے۔سیاستدان تو عدالتوں سے گھبراتا ہے نہ جیل سے۔ راجن پور کا الیکشن تحریک انصاف نے مقبولیت کی وجہ سے نہیں مہنگائی کے باعث جیتا۔
آصف زرداری نے کہا کہ ہم اگر عمران خان کو نہ نکالتے تو یہ سب کچھ بیچ دیتا۔ ہمیں معلوم تھا کہ کئی مشکلات ہیں اور اسے بہت سے کاموں سے روکنا تھا۔
ملک دیوالیہ ہونے سے ختم نہیں ہوتے:
سابق صدرکا کہنا تھا کہ ملک دیوالیہ ہونے سے ختم نہیں ہوتے،10 دفعہ جاپان دیوالیہ ہوا پھر کم بیک کیا۔اس کے علاوہ امریکا اور دبئی بھی کئی بار معاشی مشکلات کا شکار ہونے کے بعد دوبارہ سنبھلنے میں کامیاب ہوئے۔ مہنگائی کی وجہ سے عوام مشکلات کا شکار ضرور ہیں جس کا ہمیں احساس ہے۔
واضح رہے کہ سابق صدر آصف زرداری نجی طیارے کے ذریعے اسلام آباد سے ملتان پہنچے جہاں پرپیپلزپارٹی کے مقامی رہنماؤں نے ان کااستقبال کیا،آصف زرداری ملتان ایئرپورٹ سے سیدھے وہاڑی روانہ ہوئے ،یوسف رضا گیلانی اور مخدوم احمد محمود بھی ان کے ہمراہ ہیں۔
سابق صدر آصف زرداری وہاڑی میں 2روزہ قیام کے دوران سیاسی رہنماؤں ،صحافیوں اور وکلاء سے ملاقاتیں کرنے کے علاوہ منگل کو دوپہر ایک بجے ورکرز کنونشن سے خطاب بھی کریں گے۔
