کیا بلاول بھٹو کے آصف زرداری سے اختلافات ہیں؟ چیئرمین پی پی پی نے خاموشی توڑ دی

چیئرمین پاکستان پیپلزپارٹی (پی پی پی) بلاول بھٹو زرداری نے اپنے والد آصف علی زرداری کے ساتھ اختلافات کے حوالے سے خبروں پر خاموشی توڑ دی۔

نجی ٹی وی کے پروگرام میں گفتگو کے دوران ایک سوال کے جواب میں انہوں نے کہاکہ آصف زرداری کے ساتھ کوئی اختلاف نہیں۔

انہوں نے کہاکہ اس معاملے کو میڈیا پر غلط انداز میں پیش کیا گیا، انتخابات کے بعد آصف زرداری بھی وزیراعظم بن سکتے تھے مگر انہوں نے خود میرا نام وزارت عظمیٰ کے امیدوار کے لیے پیش کیا۔

واضح رہے کہ کچھ عرصہ قبل آصف زرداری نے ایک انٹرویو میں کہا تھا کہ بلاول بھٹو ابھی انڈر ٹریننگ ہیں جس کے بعد میڈیا پر خبریں سامنے آئی تھیں کہ سابق صدر کے اس بیان پر بلاول بھٹو ناراض ہو کر دبئی چلے گئے ہیں۔

آصف زرداری کے اس انٹرویو کے بعد بلاول بھٹو نے اپنے سوشل میڈیا اکاؤنٹس کی ڈی پی پر صرف بینظیر بھٹو کے ساتھ تصاویر لگائی تھیں جس سے اختلافات کے دعوؤں کو تقویت ملی تھی۔

تاہم اب چند روز قبل پیپلزپارٹی کی سی ای سی کے اجلاس میں آصف زرداری نے بلاول کا نام وزیراعظم کے امیدوار کے طور پر پیش کیا جس کی منظوری دی گئی۔

اور اب بلاول بھٹو نے بھی اپنے والد کے ساتھ اختلافات کے دعوؤں کی تردید کر دی ہے۔