پاکستان مسلم لیگ ن کی چیف آرگنائزر و سینیئر نائب صدر مریم نواز نے کہا ہے کہ اگلے 5 سال عوام کی خدمت کا ایجنڈا بنا چکے ہیں، عوام مہنگائی اور مسائل سے نجات کے لیے نوازشریف کا ساتھ دیں۔
لاہور میں پی ٹی آئی کے ٹکٹ ہولڈر مہر محمد وسیم کی دستبرداری کے موقع پر گفتگو کرتے ہوئے مریم نواز نے کہاکہ آپ نے ترقی کے قافلے میں شمولیت اختیار کرلی ہے۔
مزید پڑھیں
انہوں نے کہاکہ 2018 سے 2022 تک نااہلی کا اثر پورے پاکستان نے دیکھا اور بھگتا، خواتین رو رہی ہیں کہ گھروں میں گیس نہیں آرہی۔
مریم نواز نے کہاکہ سیاسی مخالفین کو رلانے کی خواہش رکھنے والوں کے پیدا کردہ مسائل کی وجہ سے آج پورا پاکستان رو رہا ہے۔ پوری دنیا نوازشریف کے دور کی ترقی کی مثالیں دیتی ہے۔
چیف آرگنائزر ن لیگ نے کہاکہ لاہور کی ترقی کی مثالیں دی جاتی تھیں آج وہی لاہور گندگی کا ڈھیر بن گیا۔
نوازشریف اور شہباز شریف عوام کی خدمت میں ہمیشہ سرخرو ہوئے
انہوں نے کہاکہ پاکستان کے چپے چپے پر نوازشریف، شہبازشریف کی خدمت کے نشان ہیں، خدمت کرنا مشکل کام ہوتا ہے، اس امتحان میں صرف نوازشریف، شہبازشریف سرخرو ہوئے۔
انہوں نے کہاکہ عوام کو معلوم ہے کہ کام کس نے کیا اور سیاسی انتقام کس نے لیا، جھوٹ کس نے بولا، مسلم لیگ (ن) میں کارکنوں کی عزت ہوتی ہے۔
مریم نواز نے کہاکہ مسلم لیگ (ن) پر بہت برا وقت آیا لیکن چھوٹا یا بڑا کوئی لیڈر، کارکن، کونسلر بھی چھوڑ کر نہیں گیا۔ کارکنان سگے بھائیوں کی طرح ہیں۔
نوازشریف کو نکال کر ملک میں کھنڈرات کے سوا کچھ نہیں بچتا
انہوں نے کہاکہ آپ کا مستقبل اور ترقی نوازشریف کے ساتھ جڑی ہے، نوازشریف کو نکال دیں تو ملک میں کھنڈرات کے سوا کچھ نہیں بچتا۔
مریم نواز کا کہنا تھا کہ شہبازشریف کے دور میں پنجاب میں ہر منصوبہ، ہر نوکری میرٹ پر تھی، اسی پنجاب کو تباہ کیاگیا۔
انہوں نے کہاکہ ہم پانی ، بجلی، گیس سمیت عوام کا ہرمسئلہ حل کریں گے، کارکن میرے دست و بازو بن کر باہر نکلیں۔
