ڈی جی آئی ایس آئی لیفٹیننٹ جنرل ندیم انجم نے آج لاہور میں درجن بھر یونیورسٹیوں کے طلبا وطالبات سے ملاقات کی اور اس دوران سوال و جوابات کا سیشن ہوا۔
لیفٹیننٹ جنرل ندیم انجم نے سیاسی و اقتصادی صورتحال، اندرونی استحکام، علاقائی سلامتی، یوتھ کا پاکستان کی آبادی میں بہترین تناسب، سمندر پار پاکستانیوں کی اہمیت اور کردار، تنوع میں اتحاد (مذہبی، فرقہ ورانہ، نسلی اور لسانی) پر روشنی ڈالی۔
مزید پڑھیں
ڈی جی آئی ایس آئی کی مختصر بات چیت کے بعد طلبا وطالبات نے تقریباً 50 سوالات کیے جن کے لیفٹیننٹ جنرل ندیم انجم نے مدلل جوابات دیے اور ہر سوال پوچھنے والے کو داد بھی دی۔ اس موقع پر ہال تالیوں سے گونجتا رہا۔
ایک سوال کے جواب میں ڈی جی آئی ایس آئی نے کہاکہ ہندوستان کے ساتھ تعلقات کشمیر کے مسئلہ کے پائیدار حل کے بغیر ممکن نہیں۔
مغربی سرحد پر لگنے والی باڑ کے بارے میں سوال کے جواب میں ڈی جی آئی ایس آئی نے کہاکہ بارڈر ریگولیشن پاکستان کی خود مختاری اور سیکیورٹی کے لیے اہم ہے۔ غیر قانونی اسپیکٹرم بشمول اسمگلنگ کے لیے بارڈر کراسنگ کو آفیشل گیٹس تک محدود کیا گیا ہے۔
ڈی جی آئی ایس آئی کی طلبا و طالبات کے ساتھ اس ملاقات کے بعد سوشل میڈیا پر خبریں پھیلائی جا رہی ہیں کہ لیفٹیننٹ جنرل ندیم انجم کی موجودگی میں وزیراعظم عمران خان کے نعرے لگائے گئے ہیں۔
وی نیوز نے اس حوالے سے تحقیق کی کہ کیا واقعی ڈی جی آئی ایس آئی کی موجودگی میں سیاسی نعرے لگائے گئے ہیں تو اس کا جواب نفی میں ملا۔ تاہم کچھ مخصوص لوگوں کی جانب سے ایسا پروپیگنڈا ضرور کیا جا رہا ہے۔
