میئر کراچی مرتضی وہاب سے پیپلز پارٹی کے حق میں پریس کانفرنس پر جواب طلب کرلیا گیا ہے۔ الیکشن کمیشن سندھ نے مرتضیٰ وہاب کو نوٹس بھیجتے ہوئے ان سے کل تک تحریری جواب طلب کیا ہے۔
میئر کراچی کو بھیجے جانے والے نوٹس میں الیکشن کمیشن کا کہنا ہے کہ آپ ایک مخصوص سیاسی جماعت کی حمایت کر رہے ہیں، پی پی کے حق میں کی جانے والی گفتگو ووٹرز کی رائے کو متاثر کرسکتی ہے۔
صوبائی الیکشن کمیشن نے واضح کیا ہے کہ ضابطہ اخلاق کے تحت منتخب بلدیاتی نمائندے سیاسی جماعت کی حمایت نہیں کرسکتے۔ میئر کراچی ضابطہ اخلاق کی شق نمبر 18 اور 41 کی خلاف ورزی کے مرتکب ہوئے ہیں۔
نوٹس کے مطابق ضابطہ اخلاق کے مطابق میئر، چیئرمین اور ناظم کسی سیاسی جماعت کو سپورٹ نہیں کرسکتے، میئر کراچی مرتضیٰ وہاب سے کل تک وضاحت طلب کرلی گئی ہے، وضاحت نہ دینے کی صورت میں میئر کراچی کے خلاف قانون کے مطابق کارروائی ہوگی۔
