امریکا میساچوسٹس میں مئی کا مہینہ معذور بچوں کی بروقت امداد اور مداخلت (Early Intervention) کے نام سے منایا جاتا ہے۔ اس سلسلے میں حال ہی میں 2 اہم کانفرنسز منعقد ہوئیں؛ پہلی پرکنز اسکول فار دی بلائنڈ میں بعنوان “ارلی کنکشنز” اور دوسری “میساچوسٹس ارلی انٹروینشن کنسورشیم”۔
فیڈریشن فار چلڈرن ود اسپیشل نیڈز نے ان دونوں کانفرنسز میں شرکت کی اور شرکاء کو قیمتی وسائل فراہم کیے۔
یہ فیڈریشن تقریباً 50 سال قبل قائم کی گئی تھی، جس کا مقصد افراد باہم معذور کے حقوق کا تحفظ کرنا اور انہیں قانون کے مطابق مفت اور موزوں سرکاری تعلیم (FAPE) کی فراہمی کو یقینی بنانا ہے۔
ڈائریکٹر فیملی اینڈ یوتھ انگیجمنٹ پیٹ کیمرون نے بتایا کہ FCSN امریکا کا سب سے پہلا اور بڑا “پیرنٹ ٹریننگ اینڈ انفارمیشن سینٹر” ہے۔ قانون کے مطابق ہر ریاست میں ایسے کم از کم ایک مرکز کا ہونا لازمی ہے، تاکہ خصوصی ضروریات والے بچوں کے والدین اور خاندانوں کو صحیح رہنمائی اور مدد مل سکے۔
کوآرڈینیٹر فیمیلی انگیجمنٹ سارہ فورسٹر نے “پیرنٹ ٹو پیرنٹ” پروگرام کے بارے میں آگاہ کیا کہ یہ ایک منفرد پروگرام ہے جہاں پیچیدہ طبی مسائل اور معذوری کے شکار بچوں کے والدین ایک دوسرے سے جڑتے ہیں اور ایک دوسرے کو جذباتی سہارا دیتے ہیں۔ اس پروگرام میں مختلف زبانیں بولنے والے رضاکار والدین موجود ہیں، لوگ ترجمان کے ذریعے بھی ان سے رابطہ کر سکتے ہیں۔
ارلی چائلڈ ہڈ انفارمیشن اسپیشلسٹ کیرن لوپیز کے مطابق ان کا شعبہ پیدائش سے لے کر 6 سال تک کے ان بچوں کے لیے کام کرتا ہے جو نشوونما میں تاخیر کا شکار ہوں۔ وہ والدین کو ریاست میں دستیاب وسائل اور ان کے حقوق کے بارے میں آگاہ کرتے ہیں۔ ان کے پاس ایک Multicultural ٹیم موجود ہے جو خاص طور پر ان تارکینِ وطن خاندانوں کی مدد کرتی ہے جو امریکا کے نظام سے ناواقف ہیں۔
