بلے کا نشان واپس لینے کے فیصلے کے خلاف پی ٹی آئی کی سپریم کورٹ میں نظرثانی درخواست دائر

پاکستان تحریک انصاف نے بلے کا نشان واپس لینے کے فیصلے کے خلاف سپریم کورٹ میں نظرثانی اپیل دائر کر دی ہے۔

سینئر وکیل حامد خان اور بیرسٹر علی ظفر نے پی ٹی آئی کے انٹرا پارٹی انتخابات کے فیصلے پر نظرثانی کے لیے سپریم کورٹ میں درخواست دائر کی ہے۔

نظرثانی درخواست میں استدعا کی گئی ہے کہ عدالت پی ٹی آئی کے انٹرا پارٹی انتخابات کے حوالے سے اپنے فیصلے پر نظرثانی کرتے ہوئے پشاور ہائیکورٹ کا فیصلہ بحال کرے۔

درخواست میں مؤقف اختیار کیا گیا ہے کہ انٹراپارٹی انتخابات پارٹی آئین کے مطابق کروائے گئے، الیکشن کمیشن انٹراپارٹی انتخابات کا جائزہ لینے کا اختیار نہیں رکھتا۔

درخواست میں کہا گیا ہے کہ سپریم کورٹ نے انٹرا پارٹی انتخابات سے متعلق حقائق کا درست جائزہ نہیں لیا، کسی بھی سیاسی جماعت سے انتخابی نشان واپس لینا ووٹرز کے بنیادی حقوق کی خلاف ورزی ہے۔

درخواست گزاروں کے مطابق سیاسی جماعت بنانے اور انتخابات میں حصہ لینے کا حق آئین پاکستان میں ہے، الیکشن کمیشن کا انتخابی نشان واپس لینے کا فیصلہ کالعدم قرار دیا جائے، الیکشن کمیشن نے انتخابی نشان واپس لے کر اختیارات سے تجاوز کیا ہے۔

درخواست میں الیکشن کمیشن سمیت پشاور ہائیکورٹ میں شکایت کنندگان کو فریق بنایا گیا ہے۔