نواز شریف ملک میں سیاسی و معاشی استحکام کے لیے پُرامید

پاکستان مسلم لیگ ن کے قائد و سابق وزیراعظم نواز شریف نے کہا ہے کہ ملک میں سیاسی عدم استحکام کی کوئی بات نہیں، انشااللہ ملک میں سیاسی و معاشی استحکام ضرور آئے گا۔

سابق وزیراعظم نے پارلیمنٹ ہاؤس آمد کے موقع پر صحافیوں سے گفتگو کرتے ہوئے کہاکہ اس وقت سارے معاملات معیشت سے جڑے ہوئے ہیں، حکومت معیشت کو ٹھیک کرے گی تو سب ٹھیک ہو جائے گا۔

انہوں نے کہاکہ خواہش ہے کہ ہر اسمبلی اور ہر وزیراعظم اپنی مدت پوری کرے۔ نئی حکومت آتے ہی معیشت کو ٹھیک کرے گی۔

واضح رہے کہ سابق وزیراعظم نواز شریف پارلیمانی پارٹی کے اجلاس میں شرکت کے لیے پارلیمنٹ ہاؤس پہنچے ہیں۔

نواز شریف 21 اکتوبر 2023 کو لندن سے وطن واپس پہنچے تھے، جس کے بعد انہوں نے انتخابات میں حصہ لیا، اس موقع پر یہ تاثر دیا جا رہا تھا کہ نواز شریف وزیراعظم پاکستان ہوں گے، تاہم انتخابات میں سادہ اکثریت نہ ملنے کے باعث نوازشریف پیچھے ہٹ گئے ہیں اور شہباز شریف کو وزارت عظمیٰ کے لیے نامزد کیا ہے۔