نوازشریف کے ساتھ شہبازشریف نے ہاتھ کر دیا، پرویزالٰہی

پاکستان تحریک انصاف کے مرکزی صدر چودھری پرویزالٰہی کا کہنا ہے کہ نوازشریف کے ساتھ شہبازشریف نے ہاتھ کر دیا، انہیں پھنسا کر بلایا اور ذلیل کروا دیا۔ نوازشریف کا رہا سہا بھرم بھی خاک میں مل گیا، اب یہ عوام سے منہ چھپاتے پھر رہے ہیں۔

چودھری پرویزالٰہی نے ضلع کچہری میں پیشی کے موقع پر صحافیوں سے غیر رسمی گفتگوکرتے ہوئے کہا کہ پی ٹی آئی کے مینڈیٹ پر لاڈلوں کو ڈاکا نہیں مارنے دیں گے۔ اس الیکشن کی سب سے اچھی بات یہ تھی کہ عوام نے ان لاڈلوں کو بری طرح مسترد کر دیا

 پرویزالٰہی کا کہنا تھا کہ  ہمارا انتخابی نشان چھین لیا گیا، نہ الیکشن کیمپین کرنے دی گئی، نہ پولنگ ایجنٹ بیٹھنے دیے گئے، ان سب اوچھے ہتھکنڈوں کے باوجود عوام کا عمران خان سے اظہار محبت قابل تحسین ہے۔

چودھری پرویزالٰہی کا کہنا تھا کہ چھاپے اور گرفتاریوں سے کارکنوں کو ہراساں کیا گیا، پھر بھی عوام نے عمران خان زندہ باد کا نعرہ لگایا، پی ٹی آئی کو سب سے زیادہ ووٹ اور سیٹیں دینے پرعوام کا شکریہ ادا کرتے ہیں۔

پاکستان تحریک انصاف کے مرکزی صدر کے مطابق الیکشن میں دھاندلیوں کی نئی مثالیں قائم کی گئیں، ہمارے امیدوار واضح اکثریت سے جیت رہے تھے لیکن رات کے اندھیرے میں ڈاکا مارکر نتائج بدل دیے گئے۔

ان کا کنا تھا کہ عوامی مینڈیٹ سے خالی کمزور ترین حکومت سے ملکی مسائل مزید بڑھیں گے، جمہوریت کی بحالی اور معاشی صورتحال کی بہتری کیلئے عمران خان کو وزیراعظم بنانا ہو گا۔