کور کمانڈر پشاور لیفٹیننٹ جنرل حسن اظہر حیات سے شمالی وزیرستان کے اتمانزئی قبائلی عمائدین نے ملاقات کی ہے۔
اس موقع پر اتمانزئی قبائلی عمائدین نے پاک فوج کے غیر متزلزل جذبے کو سراہتے ہوئے کہاکہ قبائلی عوام پاک فوج کی دہشتگردی کے خلاف جنگ میں قربانیوں کو قدر کی نگاہ سے دیکھتی ہے۔
مزید پڑھیں
کور کمانڈر لیفٹیننٹ جنرل حسن اظہر حیات نے کہاکہ پاک فوج قبائلی علاقوں میں عوام کی فلاح وبہبود کے لیے اپنے تمام تر وسائل بروئے کار لا رہی ہے۔
انہوں نے کہاکہ پاک فوج خیبرپختونخوا حکومت کے ساتھ مل کر قبائل کی بتدریج اپنے اپنے علاقوں میں واپسی سمیت معدنیات و دیگر شعبوں بشمول تعلیم کی بہتر فراہمی میں نوجوانوں کی نمائندگی کو یقینی بنانے کے لیے ٹھوس اقدامات اٹھا رہی ہے۔
کور کمانڈر نے دہشت گردی کے خلاف جنگ میں قبائلی عوام کا پاک فوج کے شانہ بشانہ لڑنے پر شکریہ ادا کیا۔
اتمانزئی قبائلی عمائدین نے اس عہد کا اظہار کیا کہ قبائلی عوام ہمیشہ کی طرح ملکی بقا اور سالمیت کے لیے پاک فوج اور دیگر قانون نافذ کرنے والے اداروں کے ساتھ شانہ بشانہ کھڑی رہے گی۔
