منگولیا میں شدید سردی کے باعث 30 لاکھ سے زیادہ مویشی برف میں جم کر ہلاک ہو گئے ہیں، اب تک 80 فیصد علاقہ طوفانی برف سے ڈھکا ہوا ہے۔ منگولیا کی حکومت نے ایمرجنسی کے نفاذ کا اعلان کر دیا ہے۔
چین کے ذرائع ابلاغ کی رپورٹ کے مطابق منگولیا کے اسٹیٹ ایمرجنسی کمیشن (ایس ای سی ) نے کہا کہ شدید سرد مو سم اور طوفانی برف باری کے نتیجے میں اب تک منگولیا میں 30 لاکھ سے زیادہ مویشی ہلاک ہو چکے ہیں۔
منگولیا میں کہلائے جانے والے شدید سرد ترین موسم جسے مقامی زبان میں ’ڈزڈ‘ بھی کہتے ہیں میں معمول سے کہیں زیادہ برف باری ہوئی ہے جس کی وجہ ملک کا 80 فیصد سے زیادہ علاقہ اب تک 100 سینٹی میٹر تک موٹی تہہ والی برف سے ڈھکا ہوا ہے۔منگولیا نے قدرتی آفات سے نمٹنے کے لیے ہائی الرٹ جاری کر دیا ہے۔
منگولیا کے وزیر اعظم لووسنامسرائے اویون ایرڈن نے مویشیوں کے شعبے میں مشکلات پر قابو پانے اور چرواہوں کو ہمہ جہت مدد فراہم کرنے کے لیے ہر ممکن اقدامات اٹھانے کا حکم دیا ہے۔
انہوں نے کہا کہ خانہ بدوش ملک کے تقریباً تمام صوبوں کو اس موسم سرما میں سخت موسمی حالات کا سامنا کرنا پڑا ہے۔ منگولیا دنیا کے آخری خانہ بدوش ممالک میں سے ایک ہے۔
مویشی اور گلہ بانی کو منگولیا کی معیشت کے لیے ریڑھ کی ہڈی کے طور پر سمجھا جاتا ہے، منگولیا کے قومی شماریات کے دفتر کے مطابق 2023 کے اختتام پر منگولیا میں مویشیوں کی تعداد 64.7 ملین تھی۔
