قومی ٹیم کے وکٹ کیپر بیٹر سرفراز احمد کو نیوزی لینڈ کے خلاف ٹیسٹ سیریز میں شاندار کارکردگی کے ذریعے کم بیک کرنے پر جہاں ساتھی کرکٹرز کی جانب سے مبارکبادوں کا سلسلہ جاری ہے تو وہیں سرفراز احمد نے بھی سوشل میڈیا پر سب کو جوابات دینا شروع کر دیے ہیں۔
گزشتہ روز سرفراز احمد نے نیوزی لینڈ کے خلاف دوسری اننگز میں شاندار سنچری اسکور کر کے ناصرف میچ کے بہترین کھلاڑی کا اعزاز حاصل کیا بلکہ سیریز کے بہترین کھلاڑی بھی قرار پائے۔
شاندار کارکردگی پر قومی کرکٹرز نے سوشل میڈیا پر سرفراز احمد کو اپنے اپنے الفاظ میں مبارکباد دی، کسی نے کپتان کہہ کر پکارا تو کسی نے سیفی بھائی کہہ کر داد دی۔
اب سرفراز احمد کی جانب سے بھی سوشل میڈیا پر مبارکباد دینے والے ساتھی کرکٹرز کو جواب دینے کا سلسلہ جاری ہے جس میں سے کچھ دلچسپ بھی ہیں۔
سرفراز احمد نے حسن علی کو اپنی جان کہہ کر پکارا جبکہ فہیم اشرف کو رانا جی کہہ کر ان کا شکریہ ادا کیا، اس کے علاوہ محمد نواز اور وہاب ریاض کے ٹوئٹس کا بھی جواب دیا۔
وکٹ کیپر بیٹر نے شاداب خان کے ٹوئٹ کا جواب دیتے ہوئے لکھا کہ شیڈی میری جان، ہمیشہ خوش رہو، کامیاب رہو، دین و دنیا کی ہر خوشی نصیب ہو آپ کو۔
لیکن قومی ٹیم کے سابق کپتان اور وکٹ کیپر معین خان کے بیٹے اعظم خان کے ٹوئٹ پر سرفراز احمد نے لکھا، ابا آئی لوو یو۔
