ایس آئی ایف سی کی پاکستان کے معاشی استحکام کے لیے منصوبہ بندی کیا ہے؟

اسپیشل انوسٹمنٹ فیسیلیٹیشن کونسل (ایس آئی ایف سی) نے سبسڈیز کی مد میں فنڈز کا تخمینہ پیش کردیا ہے۔

وفاقی حکومت اور صوبوں کے درمیان اپنی ذمہ داریوں کی آئینی تقسیم کو ہم آہنگ کرنے کے لیے خصوصی سرمایہ کاری سہولت کونسل اپنا کردار ادا کر رہی ہے۔

ایس آئی ایف سی کے مطابق سبسڈیز اور دیگر منصوبوں کے لیے وفاقی حکومت کی فنڈنگ جو صوبوں کے دائرہ اختیار میں آتی ہے، اس کا تخمینہ تقریباً 1 ٹریلین روپے ہے، صوبوں اور وفاق کے درمیان این ایف سی ایوارڈ پر نظرثانی کے لیے اتفاق رائے پیدا کیا جائے تاکہ محصولات کی متوازن تقسیم کی بنیاد فراہم کی جا سکے۔

ان منصوبوں میں بے نظیر انکم سپورٹ پروگرام (BISP) اور پبلک سیکٹر ڈویلپمنٹ پروگرام (PSDP) کے تحت صوبائی ترقیاتی منصوبے، اعلیٰ تعلیم، ٹیوب ویلوں کے لیے بجلی اور کھاد پر سبسڈیز شامل ہیں۔

خصوصی سرمایہ کاری سہولت کونسل (SIFC) کی کوششوں سے وفاقی حکومت کی مالی رکاوٹوں کو دور کرنے میں مدد ملے گی اور صوبوں کو دستیاب فنڈز کے بہتر استعمال کو یقینی بنایا جائے گا۔

آئی ایم ایف کا این ایف سی ایوارڈ پر نظرثانی کا مطالبہ بھی وفاقی اور صوبائی حکومتوں کے درمیان وسائل کی تقسیم میں جاری مالیاتی عدم توازن کو دور کرنے کی ضرورت پر زور دیتا ہے۔