بلوچستان حکومت نے ہندو برادری کے لیے ہولی کے موقعے پر تعطیل کا اعلان کردیا۔
مزید پڑھیں
حکومت کے جاری کردہ نوٹیفیکیشن کے مطابق وزیراعلیٰ بلوچستان کی خواہش پر صوبے میں ہولی کے موقعے پر 25 مارچ کو ہندو برادری کے لیے عام تعطیل ہوگی۔
دریں اثنا ایکس پر اپنے ایک پیغام میں وزیراعلیٰ بلوچستان میر سرفراز بگٹی نے ہندو برادری کو ہولی کی ایڈوانس مبارک باد پیش کی۔
اپنے ٹوئٹ میں وزیراعلیٰ نے کہا کہ ہندو برادری کو تمام اہلیان پاکستان کی جانب سے ہولی کی مبارکباد قبول ہو۔
https://x.com/paksarfrazbugti/status/1770478710329659657?s=48
ڈاکٹر رمیش کمار کی اپیل
یاد رہے اقلیتی ممبر قومی اسمبلی ڈاکٹر رمیش کمار وانکوانی نے بھی وزیر اعظم پاکستان اور صوبائی وزرائے اعلیٰ سے درخواست کی تھی کہ ہولی کے مقدس تہوار کے موقع پر ہندو ملازمین کے لیے پیشگی تنخواہ کی بروقت ادائیگی یقینی بناتے ہوئے عام تعطیل کا اعلان کیا جائے۔
ڈاکٹر رمیش کمار جو پاکستان ہندو کونسل کے سرپرست اعلیٰ بھی ہیں نے اپنے خط میں لکھا تھا کہ ’میں یہ امر آپ کے نوٹس میں لانا چاہتا ہوں کہ ہندو برادری کا سب سے اہم تہوار ہولی 25 مارچ 2024 کو منایا جائے گا‘۔
انہوں نے مزید کہا تھا کیہاس سلسلے میں میری قرارداد قومی اسمبلی میں پہلے ہی منظور ہو چکی ہے کہ متعلقہ اقلیتی برادری کے مذہبی تہواروں پر عام تعطیل ہونی چاہیے۔
ڈاکٹر رمیش کمار نے مارچ 2016 میں قومی اسمبلی میں قرارداد پیش کی تھی جس میں کہا گیا تھا کہ حکومتِ پاکستان کو ہولی، دیوالی اور ایسٹر کو اقلیتوں کے لیے عام تعطیلات قرار دینے کے لیے اقدامات کرنے چاہییں۔
ان کا کہنا تھا کہ مذکورہ اقدام پاکستان کا مثبت امیج اجاگر کرنے کے لیے ناگزیر ہے۔
