چیئرمین تحریک انصاف بیرسٹر گوہر خان کا کہنا ہے کہ امریکی دفتر خارجہ کے عہدیدار ڈونلڈ لو کے بیان پر پاکستانی سفارتکار اسد مجید کو اپنا مؤقف دینا چاہیے، سابق وزیر اعظم عمران خان نے اس پورے معاملے کی دوبارہ تحقیق کا پرزور مطالبہ کیا ہے۔
مزید پڑھیں
راولپنڈی میں میڈیا سے گفتگو کرتے ہوئے رکن قومی اسمبلی بیرسٹر گوہر خان کا کہنا تھا کہ سائفر کے معاملے پر ڈونلڈ لو کی تردید سراسر جھوٹ ہے کیونکہ 20 گھنٹے بعد بھی پاکستانی سفارتکار اسد مجید کا کوئی بیان سامنے نہیں آیا، یہی وجہ ہے کہ ان کی جماعت سائفر معاملہ کی دوبارہ تحقیق کا مطالبہ کرتی ہے۔
بیرسٹر گوہر خان کے مطابق امریکی عہدیدار نے گزشتہ روز اپنے بیان میں جو ثبوت دیے ہیں وہ سراسر جھوٹ ہیں، یہی وجہ ہے ان کے بیان پر اسد مجید کو اپنا تردیدی یا تائیدی مؤقف دینا چاہیے۔ بیرسٹر گوہر کے مطابق ڈونلڈ لو نے نہ صرف سائفر کے مواد بلکہ اسد مجید سے ملاقات کا بھی ذکر نہیں، انہوں نے بہت سے معاملات چھپائے ہیں۔
عمران خان کی رہائی کے لیے مذاکرات کے سوال پر بیرسٹر گوہر خان کا موقف تھا کہ بحیثیت سیاسی جماعت کسی بھی دوسری سیاسی جماعت سے مذاکرات کے دروازے ہمیشہ کھلے رہتے ہیں، تاہم عمران خان کی رہائی کو مذاکرات سے مشروط نہیں کرتے۔
’بانی پی ٹی آئی کے کیسز عدالتوں میں چل رہے ہیں، ان کی رہائی کے لیے مذاکرات نہیں کریں گے، ہم عدلیہ پراعتماد ہے، جس طرح ہمارے خلاف 14 گھنٹے کیس چلا کر 10 منٹ کے وقفے دے کر فیصلے دیے گئے، اعلیٰ عدلیہ کی آئینی ذمہ داری ہے کہ اس نوعیت کے فیصلوں نظر ثانی کرے۔‘
