آئی جی سندھ نے ڈی آئی جی کے بیٹے کی ہوائی فائرنگ کا نوٹس لے لیا

آئی جی سندھ غلام نبی میمن نے ڈی آئی جی ایسٹ اظفر مہیسر کے بیٹے کی ہوائی فائرنگ کا نوٹس لے لیا جبکہ ڈی آئی جی نے ویڈیوز کو ایڈیٹڈ قرار دے دیا۔

یاد رہے کہ کراچی پولیس کے سینیئر افسر ڈی آئی جی ایسٹ اظفر مہیسر کے بیٹے کی اسلحے نمائش اور ہوائی فائرنگ کی ویڈیوز سوشل میڈیا پر وائر ل ہوئی تھیں جن میں ان کے صاحبزادے عاشر مہیسر کو مختلف مقامات پر فائرنگ کرتے دیکھا جاسکتا ہے۔

آئی جی سندھ نے ایڈیشنل آئی جی کراچی کو واقعے کی مکمل تحقیقات کاحکم دیا ہے۔

صوبائی پولیس سربراہ کا کہنا ہے کہ تحقیقاتی رپورٹ کی روشنی میں محکمانہ کارروائی کا فیصلہ کیا جائے گا۔

آئی جی نے کہا ہے کہ اس بات کی تحقیقات کی جائیں کہ اسلحہ سرکاری ہے یا نہیں۔ انہوں نے مزید کہا کہ اس طرح خوف و ہراس پھیلانے کا حق کسی کو بھی حاصل نہیں ہے۔

مذکورہ ویڈیوز میں نوجوان کو گاڑی سے فائرنگ کرتے دیکھا جاسکتا ہے اور ایک ویڈیو میں ڈی آئی جی کی تصویربھی نظر آرہی ہے۔ ہوائی فائرنگ کی وائرل فوٹیج کب کی ہیں اس حوالے سے چھان بین شروع کردی گئی ہے۔

دریں اثنا ڈی آئی جی ایسٹ اظفر مہیسر نے ویڈیو کو بیٹے کے خلاف پروپیگنڈا قراردیا ہے۔

ڈی آئی جی ایسٹ کا کہنا ہے کہ سوشل میڈیا پر وائرل ہونے والی ویڈیوز اور تصاویر جعلی اور ایڈیٹڈ ہیں۔

انہوں نے مزید کہا کہ وہ اس حوالے سے ایف آئی اے سائبر کرائم سے بھی رابطہ کریں گے۔