چیف آف آرمی اسٹاف جنرل سید عاصم منیر نے صدر مملکت آصف علی زرداری کو ملک میں دہشت گردی کے خلاف جاری فوجی آپریشن اور ملک کو لاحق روایتی خطرات کے خلاف آپریشنل تیاریوں سے آگاہ کیا۔
ایوان صدر میں ہونیوالی اس ملاقات میں آرمی چیف نے صدرمملکت کو پاکستان کے صدر اور مسلح افواج کے کمانڈر کا عہدہ سنبھالنے پر مبارکباد دیتے ہوئے ان کی کی کامیاب مدت کے لیے نیک خواہشات کا اظہار کیا۔
مزید پڑھیں
آرمی چیف عاصم منیر نے صدر آصف زرداری کو دہشت گردی کے خلاف جاری فوجی آپریشن سمیت روایتی خطرات کے خلاف فوج کی آپریشنل تیاریوں سے آگاہ کیا، انہوں نے بلوچستان اور خیبرپختونخوا کے علاقوں سمیت ترقیاتی منصوبوں میں فوج کے کردار کے بارے میں بھی بتایا۔
صدر مملکت نے ایک مخصوص سیاسی جماعت اور اس کے چند افراد کی جانب سے ادارے اور اس کی قیادت کیخلاف محدود سیاسی مفادات کے حصول کے لیے لگائے گئے بے بنیاد اور بلاجواز الزامات پر شدید تشویش کا اظہار کرتے ہوئے رخنہ ڈالنے والے عناصر سے آہنی ہاتھوں سے نمٹنے کے عزم کا اعادہ کیا۔
ملاقات میں صدر مملکت نے پاکستان کی مسلح افواج کے مثالی کردار کو سراہتے ہوئے کہا کہ ریاست کی خودمختاری اور علاقائی سالمیت کے تحفظ میں فوج کی خدمات کلیدی حیثیت کی حامل رہی ہیں، انہوں نے قومی ترقی کی جانب پاک فوج کے غیر متزلزل عزم کو اجاگر کرتے ہوئے متاثرہ علاقوں کی سماجی ترقی کے لیے فوج کی کوششوں کو بھی سراہا۔
ملاقات میں پاکستان میں امن، سلامتی اور ترقی کی اقدار برقرار رکھنے کے لیے یکجہتی اور عزم کا بھی اظہار کیا گیا، دہشت گردی کے خلاف پاکستان کے غیر متزلزل عزم کا اعادہ کرتے ہوئے صدر مملکت آصف زرداری نے قومی طاقت کے تمام عناصر کے ذریعے دہشت گردی کا بھرپور جواب دینے کے قومی عزم کا اظہار کیا۔
صدر مملکت کا کہنا تھا کہ قوم کے لیے جانوں کا نذرانہ پیش کرنے والے شہداء کا خون ہمیشہ پاکستانی قوم کی استقامت اور طاقت کی علامت رہے گا، شہداء اور ان کے خاندانوں کی قربانیوں کو بھی خراج تحسین پیش کرتے ہوئے انہوں نے شہداء اور ان کے خاندانوں کی عزت و تکریم کے لیے قوم کے غیر متزلزل عزم کا بھی اعادہ کیا۔
