عمران خان نے اڈیالہ جیل میں ملاقاتوں کے لیے فوکل پرسنز نامزد کردیے اور اس حوالے سے اڈیالہ جیل کی اسلام آباد ہائیکورٹ میں جمع کرائی گئی رپورٹ وی نیوز نے حاصل کر لی ہے۔
رپورٹ کے مطابق بیرسٹر گوہر، عمر ایوب، شبلی فراز علی ظفر اور انتظار پنجوتھہ فوکل پرسنز میں شامل ہیں۔
شیر افضل مروت اور عمیر نیازی فہرست سے آؤٹ، وجہ کیا ہے؟
فوکل پرسنز میں شیر افضل مروت اور عمیر نیازی کا نام موجود نہیں ہے۔
عمران خان نے شیر افضل مروت کو فوکل پرسن کی ذمہ داریوں سے ہٹاتے ہوئے انہیں اپنی اپنی متوازی سوشل میڈیا ٹیم بھی ختم کرنے کی ہدایت کی ہے۔
بانی پی ٹی آئی نے شیر افضل مروت اور عمیر نیازی کو اڈیالہ جیل میں ملاقاتیوں کے لیے نام دینے کی فہرست سے نکال دیا ہے۔
عمران خان نے کور کمیٹی کی سفارشات کو منظور کرتے ہوئے ملاقاتیوں کے لیے نام دینے کی نئی فہرست دی ہے جس میں عمر ایوب، سینیٹر شبلی فراز، علی ظفر اور بیرسٹر گوہر کو شامل کیا گیا ہے۔
مزید پڑھیں
ذرائع کے مطابق کور کمیٹی کے گزشتہ اجلاس میں شیر افضل مروت اور عمیر نیازی پر شدید تنقید کی گئی تھی ۔ پارٹی رہنماؤں کا مؤقف تھا کہ مذکورہ دونوں رہنما عمران خان سے سب سے زیادہ ملاقاتیں کرتے ہیں تاہم عمران خان کا پیغام واضح انداز میں پارٹی تک نہیں پہنچتا۔
کور کمیٹی نے اس بات پر بھی تشویش کا اظہار کیا کہ شیر افضل مروت اور عمیر نیازی عمران خان سے ملاقات کرنے کے لیے فوکل پرسنز مقرر ہوئے جبکہ اس حوالے سے کور کمیٹی کو اعتماد میں نہیں لیا گیا۔
عمران خان نے اڈیالہ جیل میں بیرسٹر گوہر کو شیر افضل کو پیغام دینے کی ہدایت کی ہے کہ وہ فوری طور پر اپنا سوشل میڈیا ٹیم بند کریں اور پی ٹی آئی کے آفیشل سوشل میڈیا پلیٹ فارم پر ہی انحصار کیا جائے۔
دوسری جانب عمران خان نے جمعرات کو صرف سیاسی شخصیات سے ہی ملاقات کرنے کا فیصلہ کیا ہے اور فوکل پرسنز کو جمعرات کو صرف اور صرف سیاسی لوگوں کے نام بھیجنے کی ہدایت کی ہے۔
