پاکستان اور چین نے دو طرفہ تعلقات کا جائزہ لیتے ہوئے سیاسی، معاشی اور سیکیورٹی تعاون کو مزید فروغ دینے جبکہ ثقافتی تبادلے، سیاحت اور عوام کے درمیان تعلقات مزید مضبوط کرنے پر اتفاق کیا ہے۔
دفتر خارجہ کی جانب سے جاری پریس ریلیز کے مطابق پاک چین دوطرفہ سیاسی مشاورت (بی پی سی) کا تیسرا دور بیجنگ میں منعقد ہوا اور پاکستانی وفد کی قیادت سیکریٹری خارجہ ڈاکٹر اسد مجید خان نے کی جبکہ چینی وفد کی قیادت نائب وزیر خارجہ سن ویڈونگ کررہے تھے۔
چین پاکستان اقتصادی راہداری ( سی پی ای سی) کو ایک دہائی مکمل ہونے پر دونوں ممالک نے سی پیک کو گہری دوستی کی ایک علامت قرار دیا ہے۔
سیکریٹری خارجہ ڈاکٹر اسد مجید خان نے سنہ 2022 میں تباہ کن سیلاب کے دوران پاکستان کی امداد کرنے پر چین کا شکریہ بھی ادا کیا۔
چینی نائب وزیر خارجہ سن ویڈونگ نے پاکستان کی خودمختاری، علاقائی سالمیت اور اقتصادی سلامتی کے لیے چین کی حمایت کی یقین دہانی کرائی۔
فریقین نے باہمی دلچسپی کے متعدد علاقائی اور عالمی امور پر تبادلہ خیال کیا اور افغانستان سمیت اہم علاقائی پیش رفت کے دوران قریبی تعاون پر اطمینان کا اظہار کیا۔
