سپریم کورٹ میں عدلیہ میں مبینہ مداخلت پر ازخود نوٹس کے حوالے سے کراچی بار نے بھی سپریم کورٹ سے رجوع کرلیا ہے۔ کراچی بار ایسوسی ایشن نے بیرسٹر صلاح الدین کے ذریعے درخواست دائر کر دی۔
کراچی بار ایسوسی ایشن نے درخواست میں کہا ہے کہ سپریم کورٹ 184/3 کے تحت انکوائری کے لیے اپنا اختیار استعمال کرے اور حکومتی انکوائری کمیشن کا نوٹیفکیشن کالعدم قرار دیا جائے۔
مزید پڑھیں
درخواست میں مزید کہا گیا ہے کہ ہائیکورٹس کو فل کورٹ میٹنگز بلانے کی ہدایات جاری کی جائیں، ہائیکورٹس فل کورٹ میٹنگ میں دیگر ججز سے پوچھیں کہ انہیں مداخلت کا سامنا تو نہیں؟ ہائیکورٹس کو کسی بھی مداخلت سے متعلق رولز تیار کرنے کی ہدایات کی جائیں۔
درخواست میں کہا گیا ہے کہ حکومت کو اینٹلیجنس ایجسنیز سے متعلق بھی مکینزم تیار کرنے کا کہا جائے۔ واضح رہے کہ اسلام آباد بار ایسوسی ایشن کی جانب سے بھی فریق بننے کی درخواست دائر کی گئی تھی۔
