سپریم کورٹ نے وفاقی حکومت کو 2 ہفتے میں موسمیاتی تبدیلی اتھارٹی قائم کرنے کا حکم دیتے ہوئے کہا ہے کہ موسمیاتی تبدیلی اتھارٹی قائم نہ ہونے سے عوام کے بنیادی حقوق پر سنگین اثرات ہوں گے۔
سپریم کورٹ نے موسمیاتی تبدیلی اتھارٹی کے قیام کی 6 مئی 2024 کی سماعت کے تحریری حکم نامے میں کہا ہے کہ موسمیاتی تبدیلی کے قیام کے ساتھ حکومت اس کے لیے فنڈز کا بندوبست بھی کرے۔ موسمیاتی تبدیلی عوام کو درپیش سب سے سنگین خطرہ ہے،
مزید پڑھیں
سپریم کورٹ نے کہا ہے کہ معاملے کی سنگینی کے پیش نظر 2017 میں موسمیاتی تبدیلی ایکٹ بنایا گیا تھا، 7 سال گزرنے کے باوجود موسمیاتی تبدیلی اتھارٹی قائم ہوئی نہ فنڈز جاری ہوسکے۔ اٹارنی جنرل نے 21 مارچ کو موسمیاتی تبدیلی کونسل اجلاس کا کہا لیکن 6 مئی تک اتھارٹی قائم نہیں ہوسکی۔
حکم نامے میں کہا گیا ہے کہ پنجاب، کے پی اور سندھ نے عدالتی حکم پر موسمیاتی تبدیلی سے نمٹنے کے لیے پالیسی مسودہ جمع کروا دیا ہے، بلوچستان حکومت کے مطابق پالیسی منظوری کے لیے کابینہ کو بھیج دی گئی ہے۔ عدالت نے مزید سماعت 3 جون تک ملتوی کردی۔
