کرغزستان میں پھنسے بلوچ طلبا کو واپس لانے کا آپریشن شروع

کرغزستان میں پھنسے بلوچستان سے تعلق رکھنے والے طلبا کو وطن واپس لانے کے لیے بھی خصوصی آپریشن کا آغاز کردیا گیا۔

وزیراعلیٰ بلوچستان میرسرفراز بگٹی کی ہدایت پر ڈائریکٹر جنرل پی ڈی ایم اے جہانزیب خان خصوصی پرواز کے ذریعے کرغستان روانہ ہوگئے۔

ڈائریکٹر جنرل  پی ڈی ایم اے نے کرغزستان روانگی سے قبل گفتگو کرتے ہوئے بتایا کہ طلبا کو پی آئی اے کی خصوصی پرواز پی کے 6264 کے ذریعے واپس لایا جائے گا۔

انہوں نے کہا کہ خصوصی پرواز آج رات 9 بجے طلبا کو لیکر واپس کوئٹہ پہنچے گئی۔ انہوں نے بتایا کہ وزیراعلیٰ بلوچستان کی خصوصی ہدایت پر طبا کو واپس لانے کا آپریشن شروع کیا گیا۔

واضح رہے کہ کرغزستان میں پھنسے پاکستانی شہریوں کی وطن واپسی کا سلسلہ جاری ہے۔ بشکیک سے آج 205 طلبا پی آئی اے کی کی پرواز کے ذریعے کراچی پہنچے تھے۔ اس سے قبل کئی طلبا متعدد پروازوں کے ذریعے لاہور اور اسلام آباد پہنچے تھے۔

گزشتہ روز نائب وزیراعظم اور وزیر خارجہ اسحاق ڈار نے پریس کانفرنس کرتے ہوئے بتایا تھا کہ حکومت کے توسط اور کمرشل فلائٹس کے ذریعے اب تک 3 ہزار 233 طلبا وطن واپس آچکے ہیں، 513 طالب وفاقی حکومت اور 290 خیبرپختونخوا کے فلائٹس انتظامات کے ذریعے واپس آرہے ہیں۔