کراچی میں چھالیہ کے اسمگلرز کو مبینہ طور پر فرار ہونے میں مدد کرنے پر 2 سی ٹی ڈی اہلکاروں کے خلاف مقدمہ درج کرلیا گیا۔
مزید پڑھیں
پولیس کے مطابق گلشن معمار تھانے میں سی ٹی ڈی اہلکار انار خان اور فیاض شاہ کے خلاف مقدمہ درج کیا گیا ہے جن پر الزام ہے کہ انہوں نے اسمگلنگ میں ملوث افراد کو فرار ہونے میں مدد کی۔
واقعے کی تفصیلات کے مطابق ایک اطلاع پر گلشن معمار پولیس چھالیہ کے اسمگلرز کو پکڑنے پہنچی جہاں ٹیم نے اسمگلنگ کے لیے استعمال ہونے والی بس کے ساتھ ایک پولیس موبائل اور بکتر بند وین بھی پائی۔
گلشن معمار پولیس ٹیم نے بس اور گاڑی کو روکنا چاہا تو وہاں موجود کچھ افراد نے خود کو سی ٹی ڈی اہلکاروں کے طور پر ظاہر کیا اور ملزمان کی گرفتاری میں رکاوٹ بنے۔
پولیس نے دعویٰ کیا کہ مذکورہ افراد نے اہلکاروں پر اسلحہ تان لیا اور جان سے مارنے کی دھمکیاں بھی دیں اور اسمگلنگ میں ملوث افراد کو فرار ہونے میں مدد دی۔
مذکورہ بس سے اسمگل شدہ چھالیہ کی 80 بوریاں برآمد ہوئیں۔ واقعے کا مقدمہ سرکاری ملازم کو فرض کی ادائیگی سے روکنے اور کارسرکار میں مداخلت کی دفعات کے تحت درج کرلیا گیا ہے۔
