چاہت فتح علی خان سوشل میڈیا پر گانوں کی ویڈیوز اپ لوڈ کرتے ہیں اور خاصے مشہور ہیں۔ انہوں نے انکشاف کیا ہے کہ انہوں نے کئی اساتذہ سے موسیقی کی تعلیم حاصل کی اور 2 راگ سیکھ کر گلوکاری شروع کردی۔
مزید پڑھیں
انہوں نے اپنی مزاحیہ گائیکی کے ذریعے شہرت حاصل کی۔ ان کا تعلق پاکستان سے ہے اور ان کے پاس برطانوی پاسپورٹ بھی ہے۔ چاہت فتح علی خان کرکٹ کھیلنے لندن گئے اور پھر وہاں آن لائن ٹیکسی ڈرائیور اور سیکیورٹی پرسن کے طور پر کام کیا۔
چاہت فتح علی نے گورنمنٹ کالج یونیورسٹی لاہور سے تعلیم حاصل کی۔ حال ہی میں وہ اپنے وائرل گانے ’بدو بدی‘ کی وجہ سے میڈٰیا کی سرخیوں میں ہیں اور سوشل میڈیا پر بھی ان کی گائیکی کے حوالے سے خاصی بحث و تمحیص ہو رہی ہے۔
یہ گانا بہت وائرل ہوا اور ایک ماہ میں اسے 20 ملین ویوز ملے۔ یہ گانا بھارت میں بھی ٹرینڈ کر رہا ہے۔
حال ہی میں گلوکار نے پاکستان کے ایک نجی چینل کو انٹرویو دیا جس جس میں انہوں نے اپنی کامیابی، گلوکاری کی مہارت اور موسیقی کے میدان میں 8 سالہ جدوجہد پر روشنی ڈالی۔
بہت سے اساتذہ سے موسیقی سیکھی لیکن ۔۔۔
چاہت فتح علی خان نے کہا کہ میں نے بہت سے اساتذہ سے موسیقی سیکھی ہے لیکن صحیح طریقے سے نہیں۔
انہوں نے کہا کہ ’میں نے صرف 2 راگ سیکھنے کے بعد گانا شروع کردیا۔
ان کا کہنا تھا کہ ان کی آمدنی کا سب سے بڑا ذریعہ ان کی گلوکاری اور سوشل میڈیا ہے۔
چاہت فتح علی نے تسلیم کیا کہ ’لوگ مجھ سے محبت کرتے ہیں اور اسی لیے میں کامیاب ہوں‘۔
اپنے بارے میں انہوں ںے بتایا کہ میں ایک خوش مزاج انسان ہوں اور میرا سب سے قریبی شخص یہ جانتا ہے۔
چاہت فتح علی کو کس بات نے 2 راتوں تک بیحد اداس رکھا؟
ایک واقعے نے چاہت فتح علی کو خاصا اداس کیا اس حوالے سے بتاتے ہوئے انہوں نے کہا کہ ایک بار میرا اکاؤنٹ ہیک ہو گیا جس نے مجھے 2 راتوں تک افسردہ رکھا۔
ان کا کہنا تھا کہ پہلے وہ انٹرویو کے لیے نیوز چینلز کے پیچھے بھاگتے تھے لیکن اب چینل والے انہیں انٹرویو کے لیے بلا رہے ہیں۔ ان کا مزید کہنا تھا کہ 8 کی جدوجہد کے بعد انہیں یہ رتبہ ملا ہے۔
چاہت فتح علی کے انٹرویو پر مداحوں کی جانب سے مزاحیہ تبصرے آ رہے ہیں۔ بہت سے صارفین ان کی گائیکی کے معیار اور حالیہ گانے پر بھی ان کا مذاق اڑا رہے ہیں۔
