ہیرامنڈی نے منیشا کوئرالا کو تھکا دیا

سنجے لیلا بھنسالی کی ’ہیرامنڈی: دی ڈائمنڈ بازار‘ میں کام کرنے اور پھر بھرپور طریقے سے سیریز کی تشہیر نے منیشا کوئرالا کو تھکا دیا ہے اور انہیں لگتا ہے اب انہیں تھوڑا آرام کرلینا چاہیے۔

بھارتی میڈیا سے گفتگو کرتے ہوئے انہوں نے کہا کہ میرا خیال ہے کہ مجھے تھوڑی دیر کے لیے کہیں غائب ہوجانا چاہیے،کہیں دور چلے جانا چاہیے۔

انہوں نے کہا کہ مجھے اپنی صحت پر توجہ دینے کی ضرورت ہے اور میں تحقیق کر رہی ہوں کہ اس کے لیے میں کیا کروں۔ انہوں نے مزید کہا کہ مجھے صحت مند کھانے کی طرف واپس جانے کی ضرورت ہے اور جم کے علاوہ بھی کچھ ایسا کرنا چاہیے جس سے میں صحت مند اور تازہ دم رہوں۔

منیشا کوئرالا نے کہا کہ پچھلے 3 سال ہیرامنڈی کے لیے مختص رہے اور ہم اس کی ریلیز کے لیے متفکر اور کوشاں رہے لہٰذا اب تناؤ سے رابطہ منقطع کرنے کی ضرورت ہے، گلاب کی خوشبو سونگھنی ہے، تتلیوں کا پیچھا کرنا چاہیے۔

منیشا ہیرامنڈی کی شوٹنگ کے دوران نئے دوستوں سے روشناس ہونے پر بیحد خوش ہیں۔ انہوں نے کہا کہ اس دوران سب سے پیار ملا۔ انہوں نے مزید کہا کہ میں سنجیدہ شیخ یا رچا چڈھا کو پہلے نہیں جانتی تھی اور سوناکشی سنہا اور شرمین سے بھی اتنی واقفیت نہیں تھی لیکن ان سے اچھی دوستی ہوئی۔