وفاقی پولیس نے لوٹ مار کی وارداتوں میں ملوث گینگ کے 3 ارکان کو گرفتار کرلیا۔
مزید پڑھیں
تھانہ انڈسٹریل ایریا پولیس نے ملزمان کے خلاف کارروائی کے دوران ان کے قبضہ سے وارداتوں میں استعمال ہونے والی گاڑی اور اسلحہ معہ ایمونیشن بھی برآمد کرلیا۔
ترجمان اسلام آباد پولیس کے مطابق، ملزمان خود کو سرکاری ملازمین ظاہر کرکے سادہ لوح شہریوں کو لوٹتے تھے۔ گرفتار ملزمان کی شناخت سردار علی خان، مانی گل اور شہزادہ محمد اسماعیل کے نام سے ہوئی ہے۔
پولیس کے مطابق، ملزمان متعدد وارداتوں میں سابقہ ریکارڈ یافتہ ہیں جبکہ ملزم مانی گل تھانہ ترنول میں درج قتل کے مقدمہ میں مطلوب اشتہاری مجرم بھی ہے۔
ڈی آئی جی اسلام آباد سید علی رضا کا کہنا ہے کہ ملزمان کو ٹھوس شواہد کے ساتھ چالان عدالت کرکے قرار واقعی سزا دلوائی جائے گی، شہریوں کو ان کے قیمتی اثاثوں سے محروم کرنے والے ملزمان قانون کی گرفت سے نہیں بچ سکتے۔
