رانا ثنااللہ سے وزیراعظم آزاد کشمیر کی ملاقات، بجٹ گرانٹ میں اضافے کا مطالبہ

وزیراعظم پاکستان کے مشیر برائے سیاسی امور رانا ثنااللہ سے آزاد کشمیر کے وزیراعظم چوہدری انوارالحق نے ملاقات کی ہے۔

ملاقات میں آزاد کشمیر کے آئندہ بجٹ اور ریاست میں ترقیاتی منصوبوں سے متعلق امور پر تبادلہ خیال کیا گیا۔

ملاقات کے دوران وزیراعظم آزاد کشمیر چوہدری انوارالحق نے کہاکہ حکومت کا بنیادی مقصد گڈ گورننس اور عوام کی فلاح و بہبود یقینی بنانا ہے، گزشتہ 5 سالوں سے بجٹ گرانٹ میں کوئی اضافہ نہیں ہوا۔

انہوں نے کہاکہ سالانہ ترقیاتی منصوبوں کا ہدف پورا کرنے کے لیے بجٹ گرانٹ میں اضافہ کیا جائے۔

چوہدری انوارالحق نے کہاکہ موجودہ سیاسی و سیکیورٹی صورتحال کو مدنظر رکھتے ہوئے آزاد کشمیر کے لیے بجٹ گرانٹ میں اضافہ ضروری ہے۔

بجٹ گرانٹ میں اضافے کی تجویز پر مثبت غور کیا جائے گا، رانا ثنااللہ

اس موقع پر رانا ثنااللہ نے کہاکہ بجٹ گرانٹ میں اضافے کی تجویز پر مثبت غور کیا جائے گا، حکومت پاکستان آزاد کشمیر کی معاشی ترقی اور سماجی خوشحالی کے لیے دستیاب وسائل بروئے کار لائے گی۔

انہوں نے کہاکہ آزاد جموں و کشمیر کے عوام کو ریلیف دینے کے لیے ضروری تعاون فراہم کریں گے۔

’وفاقی حکومت آزاد کشمیر کی غیر مشروط حمایت جاری رکھے گی‘

رانا ثنااللہ نے کہاکہ وفاقی حکومت آزاد کشمیر کی غیر مشروط حمایت جاری رکھے گی۔

وزیراعظم آزاد کشمیر چوہدری انوارالحق نے مسلسل حمایت پر حکومت پاکستان کا شکریہ ادا کیا۔