پاکستان اور سویڈن کے درمیان دوطرفہ سیاسی مشاورت کا اٹھارواں دور اسلام آباد میں ہوا ہے جس میں دوطرفہ تعاون کے تمام پہلوؤں کا جائزہ لیا گیا۔
ترجمان دفتر خارجہ کے مطابق مشاورتی عمل میں سیاسی و تجارتی تعلقات اور سرمایہ کاری سمیت دیگر امور پر بات چیت کی گئی۔
مزید پڑھیں
ترجمان کے مطابق ایڈیشنل سیکریٹری خارجہ، سفیر شفقت علی خان اور سویڈن کی طرف سے سفیر ڈیگ جوہلن ڈینفیلٹ اور ڈائریکٹر جنرل نے قیادت کی۔
ترجمان نے کہاکہ پاکستان اور سویڈن کے درمیان تعلقات کی رفتار پر اطمینان کا اظہار کیا گیا اور فریقین نے دوطرفہ تعاون کو مضبوط بنانے اور اقتصادی تعاون پر مبنی وسیع تعلقات پر اتفاق کیا۔
’ملاقات میں اہم علاقائی اور عالمی پیشرفت بھی زیربحث آئی‘
ترجمان نے بتایا کہ ملاقات میں بین المذاہب ہم آہنگی کے فروغ کے لیے کیے گئے اقدامات سے بھی آگاہ کیا گیا، جبکہ اہم علاقائی اور عالمی پیشرفت بھی زیر بحث آئی۔
ترجمان نے کہاکہ دونوں فریقوں نے اقوام متحدہ اور یورپی یونین سمیت کثیرالجہتی فورمز پر باہمی دلچسپی کے تمام امور پر ہم آہنگی پر اتفاق کیا۔
ترجمان دفتر خارجہ کے مطابق ڈائریکٹر جنرل ڈیگ نے سیکریٹری خارجہ سے بھی ملاقات کی اور پاکستان سویڈن دوطرفہ تعلقات کو مضبوط بنانے پر تبادلہ خیال کیا۔
ترجمان نے کہاکہ پاکستان اور سویڈن سفارتی تعلقات کے قیام کی 75ویں سالگرہ منا رہے ہیں۔
