پنجاب میں الیکشن ٹریبونلز کے معاملے پر سپریم کورٹ نے لاہور ہائیکورٹ کے آرڈر پر حکم امتناع کا تحریری حکمنامہ جاری کر دیا۔
تحریری حکمنامے میں کہا گیا کہ29 مئی کا فیصلہ اور 12 جون کا نوٹیفکیشن آئندہ سماعت تک معطل کیا جاتا ہے اور آئندہ سماعت الیکشن کمیشن اور چیف جسٹس لاہور ہائیکورٹ کی میٹنگ کے بعد ہو گی۔
حکمنامے میں کہا گیا کہ میٹنگ چیف جسٹس لاہور ہائیکورٹ کے حلف کے بعد لاہور ہائیکورٹ میں ہوگی۔
یہ بھی پڑھیں: سپریم کورٹ نے لاہور ہائیکورٹ کا الیکشن ٹریبونلز کی تشکیل کا فیصلہ اور الیکشن کمیشن کے نوٹیفیکیشن معطل کر دیے
سپریم کورٹ نے کہا کہ الیکشن کمیشن اور چیف جسٹس لاہور ہائیکورٹ ملاقات کر کے مسئلہ حل کریں اور ملاقات نئے چیف جسٹس کے عہدہ سنبھالنے کے فوری بعد کرلی جائے۔
حکمنامے میں کہا گیا کہ الیکشن کمیشن کی اپیل زیر التوا رہے گی۔
CamScanner 07-08-2024 10.56 by Asadullah on Scribd
واضح رہے کہ سپریم کورٹ نے الیکشن ٹربیونلزکی تشکیل کے لاہور ہائیکورٹ کے فیصلے کے خلاف الیکشن کمیشن کی اپیل پر 4 جولائی کو سماعت کی تھی جس میں لاہور ہائیکورٹ کا فیصلہ اور الیکشن کمیشن کا 26 اپریل کا نوٹیفیکیشن معطل کر دیا تھا۔
مزید پڑھیے: اسلام آباد ہائیکورٹ نے الیکشن ٹریبونل کی تبدیلی کا نوٹیفکیشن معطل کردیا
چیف جسٹس قاضی فائز عیسیٰ کی سربراہی میں 5 رکنی بینچ میں جسٹس امین الدین خان، جسٹس جمال مندوخیل ، جسٹس نعیم اختر افغان اور جسٹس عقیل عباسی شامل ہیں۔
یاد رہے کہ 20 جون کو سپریم کورٹ کے 3 رکنی بینچ نے لارجر بینچ کی تشکیل کے لیے معاملہ کمیٹی کو بھجوایا تھا۔
الیکشن کمیشن کا مؤقف ہے کہ اسے الیکشن ٹربیونلز کی تشکیل کا اختیار حاصل ہے اور لاہور ہائیکورٹ کا ٹربیونلز کی تشکیل کا فیصلہ قانون کے خلاف ہے کیوں کہ ہائیکورٹ الیکشن کمیشن کے اختیارات استعمال نہیں کر سکتی۔
الیکشن کمیشن نے سپریم کورٹ سے لاہور ہائیکورٹ کے فیصلے کو کالعدم قرار دینے کی استدعا کی تھی۔
