لاہور کی انسداد دہشتگردی عدالت نے جناح ہاؤس حملہ سمیت 3 کیسز میں بانی چیئرمین پاکستان تحریک انصاف (پی ٹی آئی) عمران خان کی ضمانتیں مسترد کردیں، عدالت نے عمران خان کی عبوری ضمانتوں پر محفوظ فیصلہ سنا دیا۔
عمران خان پر لاہور کے جناح ہاؤس، عسکری ٹاؤر اور تھانا شادمان جلاؤ گھیراؤ کے مقدمات درج ہیں، جس پر عدالت نے 6 جولائی کو وکلا کے دلائل مکمل ہونے کے بعد فیصلہ محفوظ کیا تھا۔
مزید پڑھیں: جناح ہاؤس حملہ سمیت 3 مقدمات میں عمران خان کی عبوری ضمانتوں پر فیصلہ محفوظ
انسداد دہشت گردی عدالت کے جج خالد ارشد نے آج محفوظ فیصلہ سناتے ہوئے، تینوں مقدمات میں بانی پی ٹی آئی کی ضمانتیں مسترد کردیں۔
دوران سماعت پراسیکیوشن نے بانی پی ٹی آئی کی ضمانتوں کی مخالفت اور ضمانتیں مسترد کرنے کی استدعا کی تھی۔
عمران خان کے وکیل نے عدالت سے استدعا کی تھی کہ مقدمات سیاسی انتقام کا نشانہ بنانے کے لیے درج کیے گئے ہیں، لہٰذا ضمانتیں منظور کی جائیں۔
یہ بھی پڑھیں: جناح ہاؤس حملہ کیس میں نامزد 5 خواتین کی ضمانت کا تحریری فیصلہ جاری
واضح رہے کہ عمران خان کے خلاف تھانہ سرور روڑ، گلبرگ اور تھانہ شادمان پولیس نے مقدمات درج کر رکھے ہیں۔
