وزیراعظم پاکستان کے مشیر برائے سیاسی امور رانا ثنااللہ نے کہا ہے کہ آئین و قانون کے مطابق عمران خان جہاں ہیں وہیں رکھا جانا مناسب ہے کیونکہ ان کی سیاست میں فتنہ فساد کے علاوہ کچھ اور شامل ہی نہیں۔
نجی ٹی وی سے گفتگو کرتے ہوئے رانا ثنااللہ نے کہاکہ عمران خان کے ہر عمل سے انتشار اور افراتفری کی سیاست ثابت ہے، جس طرح عمران خان کو کیس لڑنے کا حق ہے اسی طرح پراسیکیوشن کو بھی حق ہے۔
یہ بھی پڑھیں عمران خان پر آرٹیکل 6 سمیت جو لگ سکا لگائیں گے، مشیر وزیراعظم رانا ثنااللہ
واضح رہے کہ بانی پی ٹی آئی عمران خان کی آج جناح ہاؤس حملہ سمیت لاہور میں درج 9 مئی کے مقدمات میں گرفتاری ڈال دی گئی ہے۔
گزشتہ روز جب عدت میں نکاح کے کیس میں عمران خان اور بشریٰ بی بی کو بری کیا گیا تو پی ٹی آئی کو امید پیدا ہوئی تھی کہ اب بانی پی ٹی آئی اہلیہ سمیت رہا ہو جائیں گے مگر اس سے قبل نیب نے توشہ خان کے نئے کیس میں دونوں کو گرفتار کرلیا۔
رانا ثنااللہ نے گزشتہ روز بھی اپنی گفتگو میں کہا تھا کہ عمران خان پر آرٹیکل 6 لگانے سمیت جو ہوسکا کریں گے۔
