فیڈرل بورڈ آف ریونیو یعنی ایف بی آر نے سیلز ٹیکس کی بعض کیٹیگریز میں رجسٹرڈ شہریوں کی بائیو میٹرک کے ذریعے دوبارہ اپنی شناختی تصدیق کے لیے نیشنل ڈیٹا بیس اینڈ رجسٹریشن اتھارٹی یعنی نادرا کے سہولت سینٹرز سے رجوع کرنے کی مہلت میں توسیع کردی ہے۔
یہ بھی پڑھیں: ایف بی آر کا ٹیکس نادہندگان کی سمیں بلاک کرنے کا اعلان، پی ٹی اے کا موقف کیا ہے؟
اس سلسلے میں، ایف بی آر نے سیلز ٹیکس کی کیٹیگری میں رجسٹرڈ شہریوں، بشمول افراد، اور ایسوسی ایشن کے اراکین اور سنگل ممبر کمپنیوں کے لیے دوبارہ بائیو میٹرک تصدیق کے لیے آخری تاریخ میں توسیع کرتے ہوئے اس عمل کو 31 اگست تک مکمل کرنے کی ہدایت کی ہے۔
ایف بی آر کی جانب سے منگل کو جاری کردہ سیلز ٹیکس سرکلر نمبر 2 آف 2024 میں کہا گیا ہے کہ سیلز ٹیکس رولز 2006 کے قاعدہ 5 کے ذیلی قاعدے (4) کے ضابطے کے تحت، ہر فرد، افراد کی ایسوسی ایشن کا کوئی بھی رکن، اور ایک کمپنی کے ڈائریکٹر جس میں صرف ایک شیئر ہولڈر یا ممبر ہو، جیسا کہ معاملہ ہو، بائیو میٹرک دوبارہ تصدیق کے لیے ہر سال جولائی کے مہینے میں نادرا کے ای سہولت سینٹر کا دورہ کرنا ضروری ہے۔
مزید پڑھیں: ایف بی آر افسران میڈیا اور سوشل میڈیا سے دور رہنے پر مجبور کیوں؟
سیلز ٹیکس ایکٹ، 1990 کے سیکشن 74 کی دفعات کے تحت، فیڈرل بورڈ آف ریونیو نے اس وقت میں توسیع کرتے ہوئے ہدایت کی ہے کہ مذکورہ افراد کے ذریعہ بائیو میٹرک دوبارہ تصدیق، جیسا کہ مذکورہ شق میں فراہم کیا گیا ہے، 31 اگست تک کی جاسکتی ہے۔
