پاکستان ٹیلی کمیونیکیشن اتھارٹی (پی ٹی اے) نے ایف بی آر کی جانب سے ٹیکس نادہندگان کی موبائل سمز بلاک کیے جانے کے اعلان پر کہا ہے یہ معاملہ ابھی زیر غور ہے، کسی بھی پیشرفت سے صارفین کو آگاہ کیا جائے گا۔
پی ٹی اے نے اپنے مختصر پیغام میں کہا ہے کہ ایف بی آر کا حالیہ فیصلہ فی الحال پی ٹی اے کی جانب سے زیر غور ہے۔ ’ہم اس معاملے پر موبائل فون آپریٹرز اور متعلقہ اسٹیک ہولڈرز کے ساتھ رابطے میں ہیں۔‘
مزید پڑھیں
پی ٹی اے حکام کا کہنا ہے ’ہمارا مقصد ریگولیٹری فریم ورک اور متعلقہ قانونی دفعات کو مد نظر رکھتے ہوئے اس حوالے سے اقدام اٹھانا ہے تاکہ ٹیلی کام صارفین کا تحفظ بھی یقینی بنایا جا سکے، معاملے پر ہونے والی کسی بھی پیشرفت سے مطلع کر دیا جائے گا۔
واضح رہے کہ فیڈرل بورڈ آف ریونیو(ایف بی آر) نے 5 لاکھ 6 ہزار671 ٹیکس نادہندگان کے نام رجسٹر موبائل ٹیلی فون بند کرنے کے احکامات جاری کر دیے ہیں، ٹیکس نادہندگان کی سمز بھی بلاک کی جائیں گی۔
ایف بی آر کا کہنا ہے کہ یہ تمام افراد 2023ء کے لیے انکم ٹیکس ریٹرن فائل کر کے اپنی موبائل فون سروسز بحال کرائیں، ایف بی آر نے ٹیکس نادہندگان کے نام ویب سائٹ پربھی ڈال دیے ہیں۔
ا علامیے کے مطابق موبائل فون ٹیکس گوشوارے جمع کروانے کے بعد ایف بی آر یا ایف بی آر کے متعلقہ دفتر کے کہنے پر ایکٹیو ہوں گے، ان افراد کے نام فوری طور پر ایف بی آر کی ویب سائٹ پر ڈال دیے گئے ہیں۔
