وزیراعظم شہباز شریف کی ہدایت پر پاکستان کے 77ویں یوم آزادی کے موقع پر ’عزم استحکام‘ کے عنوان سے ایک یادگاری ڈاک ٹکٹ بھی جاری کیا گیا جس پر جیولین اسٹک کے ہمراہ ارشد ندیم کی تصویر بھی موجود ہے۔
وزارت اطلاعات و نشریات کی پریس ریلیز میں کہا گیا ہے کہ یہ اقدام وزیر اعظم شہباز شریف کی خصوصی ہدایت پر کیا گیا ہے۔ خصوصی ڈاک ٹکٹ کا عنوان ’عظمِ استحکام‘ رکھا گیا ہے جو ملک کی ترقی اور خوشحالی کے عزم کا ثبوت ہے۔ پیرس اولمپکس 2024 میں گولڈ میڈل جیتنے اور 92.97 میٹر کے فاصلے پر بھالا پھینک کر نیا اولمپک ریکارڈ قائم کرنے پر انہیں خراج تحسین پیش کرنے کے لیے ڈاک ٹکٹ پر جیولین تھرور ارشد ندیم کی تصویر شامل کی گئی ہے۔
مزید پڑھیں:ارشد ندیم نے کیوں کہا کہ ’میرا سیاست میں آنا بنتا ہی نہیں‘؟
اعلامیے کے مطابق ڈاک ٹکٹ پر مینار پاکستان کی تصویر شامل کرکے پاکستانی قوم کی جدوجہد آزادی اور اس کی علامتی اہمیت کو اجاگر کیا گیا ہے۔ یوم آزادی کے موقع پر حکومت پاکستان کی جانب سے جاری کردہ ڈاک ٹکٹ آنے والی نسلوں کو نہ صرف آزادی کے لیے ہمارے آباؤ اجداد کی جدوجہد اور قربانیوں بلکہ پاکستان کی ترقی کے لیے حکومت کے عزم کی بھی یاد دلاتا رہے گا۔
