وزیرِ اعظم شہباز شریف نے کہا ہے کہ بجلی ترسیل کی 5 کمپنیوں میں نئے بورڈ چیئرمین اور ممبران کی تعیناتی شفاف طریقے سے کی گئی ہے، ترسیل کا نظام بہتر بنانا ترجیحات میں شامل ہے، ڈسٹری بیوشن کمپنیوں میں موجود کرپٹ عناصر کے خلاف بھرپور کارروائی کی جائے گی۔
اتوار کے روز وزیراعظم ہاؤس میں وزیراعظم شہباز شریف کی زیرِ صدارت وزارت توانائی اور پاور ڈویژن کے امور پر جائزہ اجلاس ہوا، اجلاس میں توانائی کے نظام میں اصلاحات کا جائزہ لیا گیا۔
یہ بھی پڑھیں: عوام کو آئی پی پیز کے حوالے سے ہر ممکن ریلیف دیا جائیگا، اویس لغاری
اجلاس میں گفتگو کرتے ہوئے وزیرِاعظم شہباز شریف نے کہا کہ بجلی چوری کی روک تھام، لائن لاسز میں کمی اور بجلی ترسیل کا نظام بہتر بنانا ترجیحات ہیں۔
Islamabad: Prime Minister Muhammad Shehbaz Sharif chairs a meeting on the matters related to Power Division, Ministry of Energy. pic.twitter.com/fuBiPylkAj
— PMLN (@pmln_org) August 18, 2024
انہوں نے مزید کہا کہ بجلی ترسیل کی 5 کمپنیوں میں نئے بورڈ چیئرمین اور ممبران کی تعیناتی شفاف طریقے سے کی گئی ہے، اُمید ہے ان نئی تعیناتیوں سے ڈسکوز کی کارکردگی میں بہتری آئے گی۔
یہ بھی پڑھیں: آئی پی پیز کی آڈٹ رپورٹ جاری، ہوشربا انکشافات سامنے آگئے
اس موقع پر وزیراعظم نے وفاقی وزیر پاور اور وفاقی سیکریٹری پاور کو بجلی تقسیم کار کمپنیوں کی کارکردگی ، انسداد بجلی چوری اور دیگر معاملات پر چاروں صوبوں کا دورہ کرنے اور صوبائی حکومتوں سے رابطہ کرنے کی ہدایت کی۔
وزیراعظم نے ہدایت کی کہ انسداد بجلی چوری کے لئے ہول آف دی گورنمنٹ اپروچ اپنائی جائے ، صوبائی حکومتیں انسداد بجلی چوری کے حوالے سے پولیس فورس اور تحصیلداروں کی تعداد ڈسکوز کی ضرورت کے مطابق پوری کریں۔
شہباز شریف نے کہا کہ ڈسٹری بیوشن کمپنیوں میں موجود کرپٹ عناصر سے سختی سے نمٹا جائے گا اور ان کے خلاف بھرپور کارروائی کی جائے گی ، وزیراعظم نے ڈسکوز کی عوامی شکایات کے ازالے کے حوالے سے کچہریوں کے نظام کو مؤثر اور نتیجہ خیز بنانے کی ہدایت بھی کی، وزیراعظم نے بلوچستان کے زرعی ٹیوب ویلوں کی شمسی توانائی پر منتقلی کے حوالے سے بنائی گئی اسٹیئرنگ کمیٹی کا اجلاس فی الفور طلب کرنے کی ہدایت کی۔
یہ بھی پڑھیں: بجلی کی ڈسکوز نے ہمیں ڈسکو کروا دیا
وزیراعظم کو پاور ڈویژن کے مختلف امور پر بریفنگ دی گئی، بریفنگ میں وزیراعظم کو بتایا گیا کہ بلوچستان کے زرعی ٹیوب ویلوں کی شمسی توانائی پر منتقلی کے حوالے سے ایس او پیز اور اسٹیئرنگ کمیٹی کو نوٹیفائی کر دیا گیا ہے،اچھی کارکردگی دکھانے والے افسران کی پزیرائی کے حوالے سے پیکیج تیار کیا جا رہا ہے ۔
اجلاس میں وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر پاور اویس احمد خان لغاری اور متعلقہ اعلیٰ سرکاری افسران نے شرکت کی۔
