سینیئر پاکستانی اداکار فردوس جمال حال ہی میں ایک نجی چینل کے پروگرام میں معروف اداکار ہمایوں سعید اور اداکارہ ماہرہ خان پر تنقید کے تیر برساتے نظر آئے۔ فردوس جمال نے ایک جانب ماہرہ کی بڑھتی عمر کا مذاق اڑایا تو دوسری طرف ہمایوں سعید کی اداکاری پر غصے کا اظہار کرتے کرتے دور تک چلے گئے۔
سوشل میڈیا پر یہ ویڈیو کلپ وائرل ہوا تو اداکار فردوس جمال کو ان کے بیانات اور پروگرام کے میزبان کو نامناسب سوالات پوچھنے پر خوب تنقید کا نشانہ بنایا گیا۔ اسی دوران، پاکستانی اداکار، مصنف اور ہدایتکار یاسر حسین نے بھی فردوس جمال کے اداکار ہمایوں سعید اور ماہرہ خان سے متعلق بیان پر تمام ٹیلی وژن میزبانوں کو اہم مشورہ دے دیا۔
یہ بھی پڑھیں: ’ماہرہ خان بوڑھی عورت، ہمایوں سعید ڈاکو ہیں‘ فردوس جمال کی تنقید
فوٹو اینڈ ویڈیو شیئرنگ ایپ انسٹاگرام پر ایک پوسٹ میں یاسر حسین نے ہمایوں سعید کو ٹیگ کرتے ہوئے تمام ٹی وی میزبانوں کے نام اپنے پیغام میں لکھا، ’میں ہمایوں سعید سے محبت کرتا ہوں، وہ پاکستان کے سب سے بڑے فلمی ستارے ہیں۔‘
یاسر حسین نے مزید کہا، ’میری نظر میں فردوس جمال صاحب بھی ایک کمال کے اداکار ہیں لیکن اس عمر میں انہیں شو پر بلا کے خاص اسی قسم کے سوالات پوچھنا مناسب بات نہیں، ان سے ایک ہی بار اسٹیمپ پیپر پر لکھوا لیں کہ وہ ماہرہ اور ہمایوں کے بارے میں کیا سوچتے ہیں اور انہیں بخش دیں۔‘
یہ بھی پڑھیں: احمد علی بٹ کے سوال پر ہمایوں سعید اور مداح سیخ پا کیوں؟
دوسری جانب، فردوس جمال کی بے جا تنقید کے بعد ہمایوں سعید اب تک خاموش تھے لیکن یاسر حسین کی جانب سے ٹیگ کی گئی پوسٹ دیکھ کر انہوں نے بھی اپنی خاموشی توڑنے کا فیصلہ کیا اور یاسر حسین کی اسٹوری کو شیئر کرتے ہوئے صرف قہقہہ لگا کر ناقدین کو چپ کروا دیا۔
واضح رہے کہ چند روز قبل، سینیئر اداکار فردوس جمال نے ایک نجی چینل کے پروگرام میں ماہرہ خان کی عمر سے متعلق تبصرہ کرتے ہوئے کہا تھا کہ ماہرہ بوڑھی لگتی ہیں، انہیں ہیروئن نہیں بلکہ ماں کے کردار دیے جانے چاہئیں، انسان کی اصل عمر اس کے چہرے سے واضح ہوجاتی ہے، اگر ماہرہ خان کسی کو خوبصورت نظر آتی ہیں تو اس میں ان کی کوئی غلطی نہیں۔
یہ بھی پڑھیں: ’جینٹلمین‘ کا رحمتی بالی ووڈ کے سنجے دت کو کاپی کررہا ہے؟
اداکار ہمایوں سعید کی اداکاری سے متعلق سوال پر فردوس جمال نے طوائف کی مثال دیتے ہوئے کہا تھا کہ لازمی نہیں جو زیادہ معاوضہ وصول کرے وہ بہترین اداکار بھی ہو کیونکہ زیادہ پیسہ تو طوائف بھی لیتی ہیں، ہمایوں سعید اداکاری میں ڈاکہ ڈال رہے ہیں کیونکہ قدرت ہمایوں سعید کے ساتھ ہے، انہیں بہترین وسائل ملے اور مناسب پلیٹ فارم ملا جس کو وہ کیش کررہے ہیں یہاں تک کہ وہ اپنے سے اچھے اداکاروں کو انڈسٹری میں آنے کا موقع تک نہیں دیتے۔
