محکمہ موسمیات نے گزشتہ روز امکان ظاہر کیا تھا کہ رن آف کچھ بھارت میں موجود ڈیپ ڈپریشن بہت آہستہ آہستہ مغرب و جنوب مغرب کی طرف بڑھ رہا ہے، امکان ہے یہ سسٹم سمندری طوفان میں تبدیل ہوکر سندھ کے ساحل کے ساتھ شمال مشرقی بحیرہ عرب تک پہنچ جائے گا، جس سے کراچی میں تیزہواؤں کے داخل ہونے کا امکان ہے۔
یہ بھی پڑھیں: ڈیپ ڈپریشن کراچی میں داخل،اربن فلڈنگ کی وارننگ جاری
اس سمندری طوفان کو محکمہ موسمیات نے اسنی کا نام دیا تھا، جو کراچی سے دور چلا گیا تھا، اب محکمہ موسمیات نے پیشگوئی کی ہے کہ طوفان بحیرہ عرب کے شمال مشرق میں ہے جب کہ طوفان مغرب کی جانب بڑھ رہا ہے جو کراچی کے جنوب مغرب سے 230 کلو میٹر دور ہے۔
محکمہ موسمیات کے مطابق خلیج بنگال میں ہوا کا کم دباؤ شدت اختیار کرکے ڈپریشن بن گیا ہے، جس سے سندھ میں دوسرے مضبوط مون سون سسٹم کا خطرہ منڈلانے لگا ہے، یہ سسٹم بھارتی ریاست گجرات اور راجستھان پراثرانداز ہوگا اور آئندہ 3 سے4 روز میں مشرقی سندھ پراثرانداز ہوسکتا ہے۔
یہ بھی پڑھیں: شدید بارشیں : ملک کے مختلف ایئرپورٹس پر پروازوں کا شیڈول درہم برہم
محکمہ موسمیات کے مطابق کراچی سمیت سندھ کی ساحلی پٹی پر اس کے اثرات کی اس وقت پیشگوئی نہیں کی جاسکتی۔
محکمہ موسمیات کا بتانا ہے کہ سمندری طوفان بلوچستان کی ساحلی پٹی سےقریب ہورہا ہے، طوفان اورماڑہ سے 180کلومیٹر کے فاصلے پر ہے اور گوادر سے 300 کلومیٹر دور ہے۔
محکمہ موسمیات کے مطابق بلوچستان کی ساحلی پٹی کی جانب بڑھتے ہوئے طوفان کا رخ عمان کی جانب ہوگا، طوفان کا کسی ساحل سے ٹکرانے کا امکان نہیں اور سمندر میں ہی کمزور ہوکر ختم ہونے کا امکان ہے۔
