اسلام آباد کی سیشن عدالت نے اسلحہ اور شراب برآمدگی کیس میں وزیراعلیٰ خیبرپختونخوا علی امین گنڈاپور کے ناقابل ضمانت وارنٹ جاری کرتے ہوئے انہیں کل عدالت کے روبرو پیش کرنے کا حکم دیا ہے۔
نجی ٹی وی چینل کے مطابق، ڈسٹرکٹ اینڈ سیشن کورٹ میں وزیراعلیٰ خیبرپختونخوا علی امین گنڈاپور کے خلاف اسلحہ اور شراب برآمدگی کیس کی سماعت ہوئی،سول جج شائستہ خان کنڈی نے کیس کی سماعت کی، وزیراعلیٰ علی امین گنڈا پور عدالت میں پیش نہ ہوئے۔
یہ بھی پڑھیں: حقیقی آزادی مارچ کیس: شاہ محمود اور علی امین گنڈاپور کے ناقابل ضمانت وارنٹ گرفتاری جاری
وزیراعلیٰ خیبرپختونخوا کے وکیل نے عدالت سے طبی بنیادوں پر حاضری معافی کی درخواست دائر کی، تاہم عدالت نے حاضری معافی کی درخواست مسترد کردی اور علی امین گنڈاپور کے ناقابل ضمانت وارنٹ گرفتاری جاری کر دیے۔ عدالت نے ایس ایچ او تھانہ بھارہ کہو کو کل علی امین گنڈاپور کو گرفتار کرکے پیش کرنے کا حکم دیا ہے۔
واضح رہے کہ اکتوبر 2016 میں اسلام آباد پولیس نے دعویٰ کیا تھا کہ بنی گالہ کے باہر علی امین گنڈاپور کی گاڑی سے 5 کلاشنکوف اسالٹ رائفلز، ایک پستول، 6 میگزین، ایک بلٹ پروف جیکٹ، شراب کی بوتل اور آنسو گیس کے 3 گولے برآمد ہوئے ہیں۔
علی امین گنڈاپور نے اسلام آباد پولیس کے دعوؤں کو مسترد کرتے ہوئے وضاحت پیش کی تھی کہ ان کی گاڑی میں 2 لائسنس یافتہ کلاشنکوف رائفلیں لائسنس سمیت موجود تھیں، جبکہ شراب کی بوتل میں دراصل شہد تھا، جسے پولیس اہلکاروں نے ضبط کرلیا تھا۔
