گجرانوالہ: اسکول طالبات سے مبینہ زیادتی، ملزم گرفتار، ویڈیوز برآمد

گجرانوالہ میں گورنمنٹ نان فارمل اسکول میں 5 بچیوں سے مبینہ زیادتی کرنے اور ان کی ویڈیوز بنانے کا انکشاف ہوا ہے، جس پر پولیس نے ملزم کو گرفتار کرکے مقدمات درج کرلیے ہیں۔

گجرانوالہ کے علاقہ سلیم کالونی کے گورنمنٹ نان فارمل اسکول میں بچیوں سے مبینہ زیادتی کیے جانے کا بھیانک انکشاف ہوا ہے۔ خاتون ٹیچر کے شوہر و اسکول کی کینٹین چلانے والے ملزم نے متعدد بچیوں کو اسکول میں زیادتی کا نشانہ بنایا ہے۔

صدر پولیس نے متاثرہ بچیوں کے والدین کی مدعیت میں زیادتی و دیگر دفعات کے تحت 5 الگ الگ مقدمات درج کرلیے ہیں۔ متاثرہ بچیوں نے انکشاف کیا ہے کہ ملزم انہیں متعدد بار اسکول میں زیادتی کا نشانہ بنا چکا ہے جبکہ ملزم گھناؤنے فعل کی ویڈیو بھی بناتا رہا ہے۔

صدر پولیس نے ملزم کو حراست میں لیتے ہوئے نازیبا ویڈیوز برآمد کرلی ہیں جبکہ پولیس کے مطابق ملزم نے اعتراف جرم بھی کرلیا ہے۔