عالمی منڈی میں خام تیل کی قیمتوں میں کمی کا سلسلہ جاری ہے، خام تیل کی قیمت گزشتہ سال اکتوبر میں 94 ڈالر فی بیرل تک پہنچ جانے کے بعد اب کم ہو رہی ہے اور گزشتہ ایک ماہ میں 10 ڈالر فی بیرل سے زائد کی کمی ہوئی ہے، اس وقت خام تیل کی قیمت اگست 2021 کی سطح سے بھی نیچے آ چکی ہے۔
عالمی مارکیٹ میں خام تیل کی قیمت 69.50 ڈالر فی بیرل ہونے کے بعد پاکستانی عوام امید کررہی ہے پیٹرول کی قیمت میں بڑی کمی کی جائے گی۔
یہ بھی پڑھیں: بلوچستان میں ایرانی پیٹرول کی قیمتوں میں کمی، اب دام کیا ہے؟
سال 2021 کے ماہ اگست میں عالمی منڈی میں خام تیل کی قیمت 69.75 ڈالر فی بیرل تک گر گئی تھی، اس وقت پاکستان میں ڈالر کا ریٹ 163 روپے تھا اور پیٹرول کی قیمت 119 روپے فی لیٹر تھی، اس وقت ایک مرتبہ پھر سے خام تیل کی قیمت 69.50 ہوگئی ہے، تاہم ڈالر کی قیمت 279 روپے اور پیٹرول کی قیمت 259 روپے ہے۔
اگر اس وقت اور موجودہ وقت کے ڈالر کے ریٹ کا جائزہ لیا جائے تو خام تیل کی قیمت کے مطابق اس وقت پاکستان میں پیٹرول کی قیمت 203 روپے فی لیٹر ہونی چاہیے، تاہم اس وقت حکومت پیٹرول کی فروخت پر 60 روپے فی لیٹر پیٹرولیم لیوی کی مد میں وصول کر رہی ہے۔
مزید پڑھیں: اب پیٹرول کی قیمت کا تعین حکومت نہیں کرے گی، یہ کام اب کون کرے گا؟
حکومت کی جانب سے ہر 15 روز بعد پیٹرول کی قیمت میں ردوبدل کا فیصلہ کیا جاتا ہے، ایک ماہ میں عالمی منڈی میں خام تیل کی قیمت میں 7 روپے کی کمی کے باعث توقع کی جا رہی ہے کہ پیٹرول کی قیمت 20 سے 30 روپے کی کمی ہو گی، لیکن ایسا اس لیے ممکن نہیں کہ عالمی منڈی میں خام تیل کی کمی کے اثرات پاکستان میں پیٹرول کی قیمتوں پر 2 ماہ میں اثرانداز ہوتے ہیں۔
معاشی تجزیہ کاروں کے مطابق اس وقت پیٹرول کی قیمت میں 10 روپے کی کمی ممکن ہے، زیادہ کمی آئندہ ماہ سے ہو سکے گی، پیٹرول کی قیمتوں میں کمی کا حتمی فیصلہ وزارت خزانہ اوگرا کی سمری کی روشنی میں 15 ستمبر کی شب کرے گی۔
