امریکا میں 2 ماہ سے گمشدہ ایک سرمئی رنگ کی بلی نے اپنے مالک کے گھر واپس پہنچنے کے لیے ایک طویل سفر طے کرکے دنیا کو حیران کردیا ہے۔
امریکی میڈیا کے مطابق،’رین بو‘ نامی بلی 2 ماہ قبل 4 جون کو ریاست وایومنگ میں ’یلو اسٹون نیشنل پارک‘ میں گم ہوگئی تھی۔ وہ اپنے مالک میاں بیوی کے ساتھ کیلیفورنیا سے اس نیشنل پارک میں گھومنے آئی تھی۔
یہ بھی پڑھیں: بلی نے گھر کو آگ لگا دی، لاکھوں کا نقصان
رین بو کی گمشدگی کے بعد اس کے مالک اسے 4 دن تک وہاں تلاش کرتے رہے لیکن یہ بلی انہیں نہ ملی اور بلاآخر انہیں واپس کیلیفورنیا میں واقع اپنے گھر لوٹنا پڑا۔
میڈیا رپورٹس کے مطابق، دونوں میاں کو گزشتہ ماہ کیلیفورنیا میں قائم جانوروں کے تحفظ کے ادارے کی جانب سے کال آئی، جس میں انہیں بتایا گیا کہ ان کی بلی ادارے کی تحویل میں ہے۔
وہ دونوں میاں بیوی جب اپنی بلی کو دیکھنے گئے تو حیران رہ گئے کیونکہ ان کی بلی نے وایومنگ سے کیلیفورنیا تک 900 میل کا سفر 2 ماہ میں تن تنہا طے کیا تھا اور جب اسے جانوروں کے تحفظ کے ادارے نے تحویل میں لیا وہ اس وقت اپنے گھر سے صرف 200 میل دور تھی۔
؟
بلی کی مالکن کا کہنا ہے کہ رین بو نے اتنا طویل سفر اکیلے طے کیا، اس دوران خوراک کی کمی کے باعث اس کا وزن 6 پونڈ (تقریباً 40 فیصد) کم ہوگیا ہے جبکہ زیادہ دوڑنے اور چلنے کی وجہ سے اس کے پنجے بھی خراب ہوچکے ہیں۔
یہ بھی پڑھیں: جانوروں پر تشدد: پاکستان میں جانوروں کے حقوق کے لیے کیا قوانین ہیں؟
انہوں نے بتایا کہ اب انہوں نے اپنی بلی کے ساتھ مائیکروچپ کے علاوہ جی پی ایس گلوبل ٹریکر بھی فٹ کردیا ہے تاکہ وہ آئندہ کبھی غائب نہ ہو۔ ان کا کہنا ہے کہ اب ہم کبھی کیمپنگ کرنے کہیں دور نہیں جائیں گے بلکہ گھر پر ہی کیمپنگ کیا کریں گے۔
