وزیراعلیٰ خیبرپختونخوا علی امین گنڈاپور نے ضلع کرم میں امن و امان کے مسئلے کا نوٹس لیتے ہوئے مسئلے کے پرامن حل کے لیے فوری طور پر جرگہ منعقد کرنے کی ہدایت کردی۔
وزیراعلیٰ کے پی کی ہدایت پر محکمہ داخلہ و قبائلی امور نے کمشنر کوہاٹ اور آر پی او کو مراسلہ ارسال کردیا۔
یہ بھی پڑھیں ضلع کرم میں قبائلی جھڑپیں، 6 افراد جاں بحق، متعدد زخمی
مراسلے میں کہا گیا ہے کہ گزشتہ ایک سال سے ضلع کرم میں امن و امان کے مسائل جنم لے رہے ہیں، یہ مسائل جرگوں اور قانون نافذ کرنے والوں اداروں کی کارروائیوں سے وقتی طور پر حل کیے جارہے ہیں۔
مراسلے میں تحریر ہے کہ یہ مسائل مستقل بنیادوں پر حل نہیں ہورہے، مسئلے کے مستقل حل کے لیے علاقے کے عمائدین، ممبران قومی و صوبائی اسمبلی، منتخب بلدیاتی نمائندوں اور قانون نافذ کرنے والے اداروں پر مشتمل جرگہ بلایا جائے۔
مراسلے میں کہا گیا ہے کہ جرگہ منعقد کرکے فریقین کے مطالبات صوبائی حکومت کو پیش کیے جائیں، تنازع کے مستقل بنیادوں پر حل کے لیے صوبائی حکومت کو تجاویز بھی پیش کی جائیں۔
مراسلے کے مطابق جرگے کے انعقاد کے سلسلے میں فوری بنیادوں پر اقدامات اٹھائے جائیں۔
وزیراعلیٰ خیبرپختونخوا علی امین گنڈاپور نے کہا ہے کہ فریقین صبر و تحمل کا مظاہرہ کریں اور امن و امان کے قیام کے سلسلے میں انتظامیہ سے تعاون کریں۔
انہوں نے کہاکہ عمائدین علاقہ تنازع کے پُرامن حل کے لیے اپنا اہم کردار ادا کریں۔
یہ بھی پڑھیں خیبرپختونخوا: ضلع کرم میں جھڑپوں کے دوران جاں بحق افراد کی تعداد 35 ہوگئی، فریقین فائربندی پر رضامند
واضح رہے کہ خیبرپختونخوا کے ضلع کرم میں دوقبائل آمنے سامنے ہیں اور اس دوران متعدد قیمتی جانوں کا ضیاع ہوچکا ہے۔
