نائب وزیر اعظم اور وزیرخارجہ پاکستان اسحاق ڈار نے کہا ہے کہ پی ٹی آئی کے احتجاج کی ٹائمنگ افسوس ناک اور قابل مذمت ہے۔
یہ بھی پڑھیں:بھارتی وزیر خارجہ کے حوالے سے میرا بیان سیاق و سباق سے ہٹ کر پیش کیا گیا، بیرسٹر سیف
سوشل میڈیا پلیٹ فارم ایکس پر شیئر کی گئی اپنی ٹوئٹ میں نائب وزیر اعظم نے کہا ہے کہ پی ٹی آئی کے احتجاج کی ٹائمنگ افسوس ناک اور قابل مذمت ہے۔ ایسا لگتا ہے کہ یہ ایک سیاسی جماعت کی جانب سے پاکستان کی بین الاقوامی حیثیت کو کمزور کرنے کی دانستہ کوشش ہے، خاص طور پر 1997 کے بعد پاکستان میں عالمی اہمیت کی حامل SCO سربراہی اجلاس سے پہلے۔
سفارتی کوششوں کو سبوتاژ کرنے کا منصوبہ
اسحاق ڈار کے مطابق احتجاج اور افراتفری پھیلانے کے لیے اس لمحے کا انتخاب ایس سی او کے ایجنڈے میں خلل ڈالنے اور ایک نازک لمحے میں پاکستان کی سفارتی کوششوں کو سبوتاژ کرنے کا منصوبہ ہے۔
یہ بھی پڑھیں:فسطائیت کے باوجود اسلام آباد پہنچے، آئندہ کے لائحہ عمل کا اعلان عمران خان کریں گے، علی امین گنڈاپور
نائب وزیر اعظم کے مطابق پی ٹی آئی کے احتجاج سے خطاب کے لیے پاکستان کے دورے پر آئے ہوئے وزیر خارجہ کو عوامی سطح پر مدعو کرنا بھی سیاسی فائدے کے لیے قومی مفاد اور ایس سی او سربراہی اجلاس کو نقصان پہنچانے کی کھلی کوشش ہے۔
ہمیں سیاسی انتشار کی نہیں بلکہ اتحاد کی ضرورت ہے
انہوں نے اپنی ٹوئٹ میں لکھا کہ ایک ایسے وقت میں جب دنیا دیکھ رہی ہے، ہمیں سیاسی انتشار کی نہیں بلکہ اتحاد اور ذمہ داری کا مظاہرہ کرنے کی ضرورت ہے۔ یہ پاکستان کے لیے ایک لمحہ ہے کہ وہ اپنی طاقت، عزم اور قیادت کو معمولی خلل ڈالنے والی سیاست سے اوپر اٹھ کر دکھائے۔
