پاکستان تحریک انصاف کے رہنما اور سابق اسپیکر قومی اسمبلی اسد قیصر کا کہنا ہے کہ کے پی ہاؤس میں رینجرز نے چھاپا مارا ، یہ قابل افسوس اور قابل مذمت ہے۔ حکومت آئین و قانون کاخیال نہیں رکھ رہی۔
اسد قیصر نے اپنے ایک ویڈیو بیان میں کہا کہ حکومت صرف زور اور دباؤ کے ذریعے معاملات کو آگے بڑھاناچاہتی ہے۔
یہ بھی پڑھیے نہیں لگتا کہ علی امین گنڈاپور گرفتار ہیں، گورنر خیبرپختونخوا
’اگر آپ کا خیال ہے کہ یہ حملہ ہوا اور بس ختم ہو جائے گا تو یہ غلط فہمی ہے۔ اس معاملے پر خیبر پختونخوا اسمبلی کا اجلاس بلا رہے ہیں۔
انہوں نے کہا کہ ہمارے وزیراعلیٰ کو اغوا کیاگیا، گرفتار کیا گیا، یہ پورے صوبے کی توہین ہے۔ اسد قیصر نے مطالبہ کیا کہ فوری طور پر علی امین کو چھوڑا جائے۔ علی امین کے پاس اختیار ہوگا کہ وہ اپنے فیصلے کیسے کرتے ہیں، ہم جرات اور ہمت کے ساتھ حالات کا مقابلہ کریں گے۔
سینئر رہنما تحریک انصاف اسد قیصر کا وزیراعلی خیبر پختونخواہ علی امین گنڈاپور کے اغوا اور پختونخواہ ہاؤس پر حملےکے خلاف ایک اہم ویڈیو پیغام pic.twitter.com/ROnLfFZ8sw
— Asad Qaiser (@AsadQaiserPTI) October 5, 2024
اسد قیصر کا کہنا تھا کہ ہم پرُامن لوگ ہیں اور کسی طور پر اپنی حقوق پر سودے بازی نہیں کریں گے ، ہم اپنے مؤقف سے پیچھے نہیں ہٹیں گے۔
دوسری جانب خیبرپختونخوا اسمبلی کا ہنگامی اجلاس آج دوپہر 2 بجے طلب کرلیا گیا ہے۔
یہ بھی پڑھیے: پی ٹی آئی نے علی امین گنڈاپور کو لاپتا ظاہر کرتے ہوئے بازیابی کا مطالبہ کردیا
خیال رہے کہ وزیراعلیٰ خیبر پختونخوا علی امین گنڈاپور کو حراست میں لیے جانے کی متضاد اطلاعات ہیں۔ سرکاری ذرائع نے علی امین گنڈاپور کی گرفتاری کی تردید کی جبکہ اپوزیشن لیڈر عمر ایوب اور مشیراطلاعات خیبرپختونخوا بیرسٹرسیف نے علی امین کی گرفتاری کا دعویٰ کیا۔
ذرائع وزارت داخلہ کے مطابق علی امین گنڈاپور کو نہ ہی گرفتار کیا گیا اور نہ ہی حراست میں لیا گیا ہے۔ اس متعلق پھیلائی جانے والی خبریں من گھڑت اور بے بنیاد ہیں۔
