کہاوت مشہور ہے کہ کوشش کرنے والوں کی ہار نہیں ہوتی اور اس جملے کی جیتی جاگتی مثال ہیں کوئٹہ کی رہائشی ملائکہ زاہد جو گزشتہ 9 سال سے باکسنگ کے کھیل سے منسلک ہیں۔
ملائکہ نے کوئٹہ میں خواتین کے لیے باکسنگ کلب نہ ہونے کی وجہ سے اپنے گھر کے ایک کمرے میں چھوٹا سا جم بھی بنایا ہے جہاں وہ کالج اوقات کے بعد کئی گھنٹے باکسنگ کی پریکٹس کرتی ہیں۔
وی نیوز سے گفتگو کرتے ہوئے ملائکہ نے کہا کہ بلوچستان میں خواتین کا کھیل کے شعبے میں آگے آنا کوئی آسان بات نہیں کیوں کہ یہاں خواتین کے لیے کسی قسم کی سہولیات موجود نہیں ہیں۔ انہوں نے مزید کہا کہ میں نے بھی باکسنگ کا اپنا سفر لڑکوں کے کلب سے ہی شروع کیا تھا۔
یہ بھی پڑھیں: عالمی کراٹے کمبیٹ کے فاتح شاہ زیب رند کوئٹہ پہنچ گئے، وزیراعلیٰ بلوچستان نے استقبال کیا
انہوں نے کہا کہ ہمارے معاشرے میں خواتین کا کھیل میں بڑھ چڑھ کر حصہ لینے کو معیوب سمجھا جاتا ہے لہٰذا مجھے بھی ابتدا میں خاندان اور معاشرے والوں کی تنقید کا سامنا کرنا پڑتا تھا لیکن وقت گزرنے کے ساتھ ساتھ اور کامیابی حاصل کرنے بعد لوگ آپ کو اہمیت دینا شروع کر دیتے ہیں۔
ملائکہ اب تک 5 بار نیشنل چیمپیئن رہ چکی ہیں۔ اس کے علاوہ وہ ضلعی اور صوبائی سطح پر ہونے والے مختلف مقابلوں میں بھی کامیابی کے جھنڈے گاڑ چکی ہیں۔
مزید پڑھیے: پاکستانی خاتون کوہ پیما نے دنیا کی بلند ترین چوٹی ’ایورسٹ ’سر‘ کرلی
وہ مستقبل میں کامن ویلتھ گیمز اور اولمپکس سمیت دیگر بین الاقوامی کھیلوں میں حصہ لے کر ملک کا نام روشن کرنے کا پختہ عزم رکھتی ہیں۔
